«Ադրբեջանական կողմը կրակել է Արավուս գյուղի հովվի ուղղությամբ. Բարեբախտաբար, նա չի վնասվել». Արգամ Հովսեփյան
Այսօր ժամը 05։30-ին Ադրբեջանը կրակ է բացել Տեղ համայնքի հատվածում տեղակայված հայկական դիրքերի ուղղությամբ, ինչի հետևանքով հայ զինծառայող է վիրավորում ստացել։ Այս մասինտեղեկացրել էր ՀՀ Պաշտպանության նախարարությունը և հայտնել, որ զինծառայողի կյանքին վտանգ չի սպառնում։
168.am-ի հետ զրույցում Տեղ համայնքի ավագանու «Ապրելու երկիր» խմբակցության ղեկավար, Արավուսի նախկին գյուղապետ Արգամ Հովսեփյանն ասաց, որ երեկ երեկոյան ևս ադրբեջանական կողմը կրակել է Տեղ համայնքում տեղակայված հայկական դիրքերի ուղղությամբ։
«Երեկ ժամը 17։30-ի մոտակայքում ադրբեջանական կողմը կրակել է Սև լճի ու Տեղ համայնքի ուղղությամբ։
Կրակոցների ժամանակ ադրբեջանական կողմն օգտագործել է գնդացիրներ։ Կրակոցներ եղել են նաև Արավուս գյուղի ուղղությամբ, բարեբախտաբար, վնասներ չունենք։ Ադրբեջանական կողմը կրակել է գյուղի հովվի ուղղությամբ, մարդը անասուններին դաշտ է տարել, նրանք էլ կրակել են, մտածել են՝ երևի իրենց հսկողության տակ տարածք է ուզում անցնել։ Դե, Արավուս գյուղը կպած է հենց ադրբեջանական դիրքերին, անասունները մի քիչ վերև է տարել, նրանք էլ կրակել են։
Բարեբախտաբար, մարդը վնասներ չի կրել՝ ուղղակի վախեցնելու նպատակով են կրակել»,- նշեց Արգամ Հովսեփյանը։
Հիշեցնենք՝ ադրբեջանական կողմը Տեղ համայնքի հատվածում առաջ է եկել մարտի 30-ին և դիրքավորվել, իսկ ապրիլի 11-ին կրակ էր բացել հայկական դիրքերի ուղղությամբ, որի հետևանքով հայկական կողմն ունեցել է 4 զոհ և 6 վիրավոր։ Այս պահին էլ ադրբեջանական ԶՈւ ներկայացուցիչները շարունակում են մնալ իրենց կողմից օկուպացված հատվածներում՝ թիրախում պահելով նաև խաղաղ հայ բնակչությանը։
