Մեծ Բրիտանիան Ուկրաինային է հանձնում նոսրացված ուրան պարունակող արկեր
Մեծ Բրիտանիայի պաշտպանության փոխնախարար բարոնուհի Գոլդին պաշտոնապես հայտարարել է, ի պատասխան իր գործընկեր Լորդ Հիլթոնի խորհրդարանական հարցման, որ Լոնդոնը Ուկրաինային է փոխանցում նոսրացված ուրան պարունակող արկեր, գրում է BBC-ն:
«Ուկրաինային Challenger-2 հիմնական մարտական տանկեր տրամադրելու հետ մեկտեղ մենք կմատակարարենք զինամթերք, այդ թվում՝ նոսրացված ուրան պարունակող զրահաթափանց արկեր: Նման արկերը շատ արդյունավետ են ժամանակակից տանկերն ու զրահամեքենաները ոչնչացնելու համար», ասել է նա:
Ուրանը մեծ խտություն և կարծրություն ունի: Այս հատկությունների շնորհիվ այն օգտագործվում է ինչպես ռազմական զրահի, այնպես էլ զինամթերքի արտադրության մեջ՝ հիմնականում զրահաթափանց արկերի միջուկներ։ Նոսրացված ուրանն այնքան էլ ռադիոակտիվ չէ, թեև համարվում է թունավոր և քաղցկեղածին:
Ավելի վաղ Սպիտակ տունը հրաժարվել էր հաստատել նման արկերի մատակարարումը Ուկրաինային։ Իր հերթին, Կրեմլը հայտարարել է, որ Ուկրաինայում դրանց օգտագործումը կդիտվի որպես «կեղտոտ ռումբ»:
