Փաշինյանի ցուցումով Քննչական կոմիտեն փնտրում է Դիմադրության շարժման ժամանակ Փաշինյանի կազմակերպած սադրանքը կանխած անձանց
Այսօր Քննչական կոմիտեն (ՔԿ) մի տեսանյութ է հրապարակել և նշել՝ որոնվում են տեսագրության մեջ պատկերված անձինք:
Տեսանյութը նախորդ տարվա Դիմադրության շարժման ընդդիմության հանրահավաքներից է: Տեսանյութում ձայն չկա, ավելի ճիշտ՝ օրիգինալ ձայնը չկա, և միայն պատկերներից կարող ենք հասկանալ, որ ցուցարարները, ըստ ամենայնի, փողոց են փակել, և մի ավտոմեքենա՝ 06 TT 016 պետհամարանիշներով, մտել է ցուցարարների մեջ, և ինչ-որ խնդիր կա:
Հիմա Քննչական կոմիտեն փնտրում է այդ անձանց:
Տեսանյութը կասկածելի թվաց այն առումով, որ Դիմադրության շարժումից անցել է գրեթե 1 տարի ժամանակ, տեսանյութում էլ ակնհայտ հանցանքի կադրեր չկային, ուրեմն ինչո՞ւ է Ոստիկանությունը փնտրում կադրերում երևացող անձանց:
168.am-ը ուսումնասիրեց նախորդ տարվա մայիսի 1-ից մեկնարկած Դիմադրության շարժման հանրահավաքների, երթերի կադրերը, և, ո՜վ զարմանք, հայտնաբերեցինք ՔԿ-ի հրապարակած տեսանյութը, բայց այս անգամ՝ օրիգինալ ձայնով:
Տեսանյութը հրապարակել էր Նիկոլ Փաշինյանի ընտանեկան կայքի՝ Armtimes.com-ի յութուբյան ալիքը, վերնագրելով՝ «Քաղաքացին մեքենայով մտել է փողոց փակողների երթի մեջ ու միացրել «Դուխով» երգը»:
Հրապարակված տեսանյութի կադրերի մեջ շատ կարևոր հանգամանք կա՝ ցուցարարները սադրիչին հորդորում են՝ քշի գնա, արա…, ու վերջինս հեռանում է: Բռնություն չեն գործադրում, չեն իջեցնում մեքենայից, ընդամենն ընդդիմության ցույցի ժամանակ ընդդիմադիրների շարքերի մեջ մտած ակնհայտ սադրիչին հորդորում են հեռանալ…
Հիմա, ՀՀ Քննչական կոմիտեն, բանուգործը թողել, այդ անձանց է փնտրում: Սա թեպետ շատ նման է Նիկոլ Փաշինյանի՝ ԱԱԾ-ին տված սատանաներ փնտրելու հրահանգին, բայց որ ՔԿ-ում այդքան պարապ են, մի երկու բան էլ մենք ասենք… Թող փնտրեն…
Մինչ այդ, իհարկե, ՔԿ-ին հիշեցնենք՝ ով է սադրիչը: Եթե Քննչական կոմիտեում մի քիչ ջանք գործադրեին՝ google գոնե անեին՝ տեսանյութի ու հայտարարության շոուի կարիք չէր լինի:
Ցուցարարների շարքեր մտած սադրիչը, պարզվում է, «իրականում ոստիկան է, կամ, որ ավելի ճիշտ կլինի ասել՝ պարեկ Արտյոմ Չոբանյանն է, ով ծանոթների շրջապատում հայտնի է «միլիցա ծյոմիկ» անունով։ «Միլիցա ծյոմիկը», բացի սադրիչ լինելուց, օգտահաշիվ ունի նաև Ֆեյսբուքում։ Արտյոմ Չոբանյանը Սոսե փողոցի բնակիչ է»:
Այս մասին alternative.am-ն էր գրել: Այսինքն՝ «Հայկական ժամանակի» ասած «քաղաքացին» հենց «Միլիցա Ծյոմիկ» կոչվածն է եղել:
Տեղեկությունը, ի դեպ, կարծես թե չի էլ հերքվել:
Վերադառնանք ՔԿ-ի «ջանքերին»:
Իսկ ՔԿ-ն չի՞ ուզում, օրինակ, փնտրել ու գտնել 2018թ. ճանապարհներ փակող, հատուկ պաշտպանության օբյեկտ հանդիսացող Ռադիոտան դռները ջարդող անձանց… Նրանցից շատերի դեմքերը, ի դեպ, լավ ճանաչելի են մեր հանրության համար:
Իսկ ՔԿ-ն 47 համար ավտոբուսի ճանապարհը փակած, հիմա վարչապետ աշխատող անձնավորությանը բան չունի՞ ասելու: Թե՞ 2018թ. իրավախախտումները «օյին չեն»:
Քննչական կոմիտեի վարքագծից կարելի է հասկանալ՝ եղել է ուղիղ ցուցում՝ փնտրել ու գտնել նախորդ տարվա հանրահավաքների ակտիվ մասնակիցներին: Վախենո՞ւմ է Նիկոլ Փաշինյանը, դժվար է ասել, վախենալու բան ունի՞, միանշանակ… Ինքը հո գիտի՞՝ ինչ է բանակցում ու ի՞նչ է ստորագրելու…
Իսկ Արգիշտի Քյարամյանը, թերևս, մտածելու բան ունի… Ինքն ամենևին միակը չէ, ում Նիկոլ Փաշինյանն օգտագործել ու շարքից հանել է…
