ՀԱՊԿ-ը ծանուցում չի ստացել Հայաստանում զորավարժությունների չեղարկման մասին. կազմակերպության մեկնաբանությունը
Ներկայումս ՀԱՊԿ քարտուղարությունը հայկական կողմից պաշտոնական ծանուցումներ չի ստացել կազմակերպության կողմից սահմանված կարգով «Անխախտ եղբայրություն-2023» զորավարժությունների չեղարկման մասին։
Այս մասին ՀԱՊԿ մամուլի քարտուղար Վլադիմիր Զայնետդինովի մեկնաբանությունն է մեջբերել «Новости-Армения» կայքը:
Մեկնաբանությունը տրվել է 2023 թ. հունվարի 10-ին Երևանում կայացած մամուլի ասուլիսի ժամանակ Նիկոլ Փաշինյանի այն հայտարարության առնչությամբ, որ «ստեղծված իրավիճակում մենք նպատակահարմար չենք գտնում անցկացնել ՀԱՊԿ-ի զորավարժությունները Հայաստանի Հանրապետության տարածքում, առնվազն այս տարի»:
«Պաշտպանության նախարարների խորհրդի և Անվտանգության խորհուրդների քարտուղարների կոմիտեի կողմից ընդունված՝ 2023 թվականի համար ՀԱՊԿ հավաքական անվտանգության համակարգի հրամանատարական և վերահսկիչ մարմինների և ուժերի ու միջոցների կազմավորման պլանը նախատեսում է «Անխախտ եղբայրություն-2023» զորավարժությունների անցկացում ՀԱՊԿ խաղաղապահների ուժերի հետ Հայաստանի Հանրապետության տարածքում: Այս զորավարժության անցկացման անհրաժեշտությունը այս տարի հայկական հողի վրա անցկացնելու վերաբերյալ նախապես հաստատվել է նաև Երևանում: Մենք հասկանում ենք Հայաստանի Հանրապետությունում այսօր ստեղծված իրավիճակը, որը կարող է թույլ չտալ, որ ՀԱՊԿ նախատեսվող խաղաղապահ զորավարժությունները լիարժեքորեն անցկացվեն այս տարի»,- ասվում է հայտարարության մեջ։
Նշվում է, որ ՀԱՊԿ քարտուղարությունը և միացյալ շտաբը գործադրում են բոլոր ջանքերը, որպեսզի կազմակերպության կանոնադրական մարմինների կողմից հաստատված զորքերի (Հավաքական ուժերի) մարտական պատրաստության պլաններն ամբողջությամբ իրականացվեն՝ ՀԱՊԿ անդամ երկրների անվտանգության ապահովման շահերից ելնելով նրանց պատրաստվածությունը բարձրացնելու նպատակով:
Հիշեցնենք, որ երեկ էլ ՀԱՊԿ շտաբի մամլո քարտուղար Վլադիսլավ Շչեգրիկովիչն ասել էր, որ Հայաստանի մերժումից հետո ՀԱՊԿ միացյալ շտաբն առաջարկներ է մշակում այլ պետությունների տարածքում զորավարժություններ անցկացնելու համար:
Հրապարակման պատրաստեց 168.am-ը
