Թուրքիայում խոշոր ավտովթարներ են տեղի ունեցել
Թուրքիայում նախորդ երկու օրերին խոշոր ավտովթարներ են տեղի ունեցել, որոնց հետևանքով եղել են բազմաթիվ զոհեր և վիրավորներ: Այս մասին տեղեկացնում է ermenihaber.am-ը։
Մասնավորապես Մարդին նահանգի Դերիք շրջանում բեռնատարը մխրճվել է մարդկանց բազմության մեջ: Ըստ տեղեկությունների՝ խափանվել են բեռնատարի արգելակները: Մեքենան բախվել է շինության, որտեղ սրճարան է եղել: Նախնական տվյալներով՝ առնվազն 20 մարդ է մահացել, իսկ 26-ը՝ վիրավորվել:
Թուրքիայի Գազիանթեփ-Նիզին ավտոճանապարհին միմյանց են բախվել շտապօգնության, հրշեջ ծառայության մեքենաները և թուրքական «Ihlas» լրատվամական գործակալության լրագրողներին տեղափոխող մեքենան: Ճանապարհատրանսպորտային այդ պատահարի հետևանքով 16 մարդ է մահացել, այդ թվում՝ 2 լրագրող, իսկ 22-ը՝ ստացել տարբեր աստիճանի մարմնական վնասվածքներ։
Եվս մեկ վթար է տեղի ունեցել Թուրքիայի Ռիզե նահանգում. Զբոսաշրջիկներ տեղափոխող ավտոբուսը բախվել է մի մեքենայի ու կողաշրջվել։ Ավելի քան 20 մարդ վիրավորվել և հոսպիտալացվել է։
