Կենդանիների ապօրինի վաճառքի և շրջանառության արդյունքում կորոնավիրուսի տարածումը մինչ օրս հաստատված, ապացուցված չէ. համաճարակաբան
Այսօր Կառավարության հերթական նիստում անդրադառնալով բացօթյա ապօրինի առևտրին՝ Երևանի քաղաքապետ Հրաչյա Սարգսյանը նախ զեկուցել էր, որ այսօր առկա գործիքակազմը բավարար չէ վարչական իրավախախտումներով սահմանված պատասխանատվության ենթարկելու համար: «Շատ դեպքերում այդ տուգանքները չենք կարողանում գանձել քաղաքացիներից, 90 տոկոս դեպքերում իրենք իրենց անունով գույք չեն ունենում, և գնում ու սնանկ են դառնում։ Խնդրի լուծումը մենք տեսնում ենք հետևյալ կերպ՝ ոչ սահմանված վայրերում առևտուր իրականացնելու դեպքում կարողանանք բռնագրավել այն միջոցները, որոնք օգտագործվում են ծառայություններ մատուցելու կամ առևտրի համար: Դրանով, կարծում ենք, այս խնդիրը վերջնականապես կկարողանանք լուծել։ Պարբերաբար մենք Երևանում միջոցառումներ ենք իրականացնում, բայց ժամեր հետո այդ ամենը նորից կրկնվում է»,- նշել է քաղաքապետը։
Անդրադառնալով օրենսդրական նախաձեռնությանը՝ Նիկոլ Փաշինյանը նշել է, որ ամենամեծ խնդիրը մեր երկրում ինստիտուտներ և ստանդարտներ սահմանելն է. «Պրոբլեմները մենք ունենում ենք այն ժամանակ, երբ աղետ կամ աղետի նման մի բան է լինում, հետո հետահայաց նայում, ասում ենք՝ ինչի՞ ենք այսքան տարի կոմպրոմիսների մեջ»:
Նա ընդգծել է, որ կառավարությունը պետք է վճռականություն ցուցաբերի և երկրում ստանդարտներ սահմանի: Այդ համատեքստում Նիկոլ Փաշինյանը կարևորել է հրավտանգ նյութերի ներմուծումը, արտադրությունը և օգտագործումը միայն լիցենզավորված կազմակերպությունների կողմից իրականացնելը. «Այսինքն՝ ազատ վաճառքը պետք է արգելվի։ Մենք չենք ասում՝ երկրում հրավառություն չպիտի լինի, այդ թվում՝ մասնավոր առիթներով, բայց և՛ ներմուծումը, և՛ պահեստավորումը, և՛ անվտանգության ապահովումն ու օգտագործումը պետք է իրականացնեն լիցենզավորված կազմակերպությունները։ Նույնն էլ փողոցային այս առևտուրն է, արդեն 30 տարի մայրաքաղաքում քննարկվում է։ Պետք է սկզբունքային որոշումներ կայացնենք և առաջ գնանք»։
Արձագանքելով քաղաքապետի պարզաբանումներին՝ Նիկոլ Փաշինյանը աղետի պատճառ դարձած մի քանի օրինակ բերեց, և դրանցից մեկը վերաբերում էր կորոնավիրուսի տարածմանը. «Կորոնավիրուսի համավարկը գիտեք՝ ո՞նց է տարածվել՝ առնվազն պաշտոնական վարկածը դա է. կենդանիների ապօրինի վաճառքի և շրջանառության արդյունքում: Կամաճարակ կբռնվի, կգանք մեկ րոպե լռությամբ զոհերի հիշատակը կհարգենք, հետո կասեն՝ բա էսքան ժամանակ պետությունը չէր մտածո՞ւմ, որ կարա սենց լինի»:
168.am–ը փորձեց երկրի վարչապետի հայտարարության վերաբերյալ պարզաբանումներ ստանալ մասնագետներից:
Կենսաբան, վիրուսաբան Հովակիմ Զաքարյանն անդրադառնալով կորոնավիրուսի՝ կենդանիների ապօրինի վաճառքի և շրջանառության արդյունքում տարածվելու հնարավորությանը, ասաց, որ դա գոյություն ունեցող վարկած է:
«Ոչ հարյուր տոկոսով հերքվել, ոչ էլ հարյուր տոկոսով հաստատվել է: Վաղուց շրջանառվում է այդ վարկածը»,- ասաց վիրուսաբանը:
Համաճարակաբան Էդուարդ Հովհաննիսյանն էլ նշեց, որ բազմաթիվ վարկածներ կան:
«Կենդանածին վարկածը դեռևս չի հաստատվում, քանի որ կենդանիներից մարդկանց անցած հիվանդություններն ապացուցվում են այն ժամանակ, երբ դու կենդանիների շրջանում հայտնաբերում ես աղբյուրը: Այսինքն, հայտնաբերում ես կենդանի, որի մոտ կա այդ վիրուսը՝ այդ տեսակով: Մինչ օրս որպես հստակ աղբյուր, որ այսինչ կենդանուց եկած վիրուս է, հաստատված, ապացուցված չէ: Կա բավականին հիմնավոր վարկած, որ արհեստականորեն ստեղծված վիրուս է»,- նշեց Էդուարդ Հովհաննիսյանը:
