Սննդաբանն ասել է՝ ինչ ուտել 40 տարեկանից հետո քաշ կորցնելու համար

Չնայած տասնամյակներ շարունակ շատերը գտնում էին, որ տարիքի հետ քաշ կորցնելն ավելի դժվար է դառնում, սակայն նոր հետազոտությունները ցույց են տալիս, որ նյութափոխանակությունը 20-60 տարեկանում չի փոխվում։ Նույնիսկ 60 տարեկանից հետո նյութափոխանակությունը դանդաղում է ընդամենը մեկ տոկոսով։ Eat This Not That! հարթակի փոխանցմամբ՝ սննդաբանները նշում են, որ մենք ավելի շատ վերահսկողություն ունենք նյութափոխանակության վրա, քան կարծում էինք։

Նյութափոխանակության արդյունավետությունը պահպանելու համար հարկավոր է օգտագործել մի շարք կարևոր սննդանյութեր։ Հարկավոր է ընտրել սննդամթերք, որոնք հարուստ են սպիտակուցներով, վիտամին D-ով և կալցիումով։

shantnews–ի փոխանցմամբ՝ սննդաբան Քերոլայն Թոմասոնը թվարկել է լավագույն սպիտակուցային մթերքները 40 տարեկանից հետո քաշ կորցնելու համար։

Նա խորհուրդ է տալիս սննդակարգում սաղմոն ավելացնել, քանի որ այն հարուստ է սպիտակուցներով և օմեգա-3 ճարպաթթուներով: Սննդի յուրաքանչյուր ընդունման ժամանակ սպիտակուց պարունակող մթերք օգտագործելը թույլ է տալիս ավելի երկար քաղց չզգալ։

Սննդաբանը նաև խորհուրդ է տալիս օրական գոնե մեկ ձու ուտել։ Նրա խոսքով՝ այս մթերքը, բացի սպիտակուցից, պարունակում է վիտամին D, խոլին և երկաթ։

Մեկ այլ սննդամթերք, որը Թոմասոնը խորհուրդ է տալիս օգտագործել, հունական մածունն է, որի մեկ բաժակը պարունակում է 17 գրամ սպիտակուց։ Այն կարելի է համեմել հատապտուղներով, դարչինով:

Հաջորդ սննդամթերքը, որ խորհուրդ է տալիս սննդաբանը, էդամամե լոբին է։ Այն հարուստ է սպիտակուցներով, մանրաթելերով և ֆիտոէստրոգենով։ Դա կարող է հատկապես օգտագկար լինել դաշտանադադարում գտնվող կանանց համար, ում մոտ էստրոգենների մակարդակը նվազում է. ֆիտոէստրոգենները գործում են որպես բնական էստրոգեն։