Նոր մրցանակ է սահմանվելու՝ «Հանրապետություն». ո՞ւմ է վերաբերում

Կրթության, գիտության, մշակույթի և սպորտի նախարարությունը հանրային քննարկման է ներկայացրել «Հանրապետություն» անվամբ մրցանակ սահմանելու մասին նախագիծը:

Հիմնավորման մեջ նշվում է, որ «Հանրապետություն» մրցանակ սահմանելու մասին» Հայաստանի Հանրապետության կառավարության որոշման նախագիծը մշակվել է ի կատարումն Հայաստանի Հանրապետության վարչապետի 2022 թվականի մայիսի 25-ի N 02/11/16695‑2022 հանձնարարականի՝ հիմք ընդունելով «Պետական մրցանակների մասին» օրենքի 3-րդ հոդվածի 4-րդ մասը: Որոշման ընդունմամբ հնարավոր է դառնում Հայաստանի Հանրապետության զարգացման գործում ներդրած ավանդի համար գնահատման ու պարգևատրման ևս մեկ համակարգ ներդնել, որը կնպաստի հանրապետության տնտեսության տարբեր ոլորտների զարգացմանը:

Նմանատիպ մրցանակներ սահմանվել և շնորհվել են 2004-2018 թվականներին՝ ՀՀ նախագահի համապատասխան հրամանագրի համաձայն:

Նոր մրցանակն առաջարկել է սահմանել «Ռոբերտ Պողոսյան և որդիներ» հիմնադրամը: Նախագիծը նպատակ է հետապնդում Հայաստանի Հանրապետության զարգացման գործում ունեցած ավանդի գնահատման ու խրախուսման, տնտեսության զարգացման համար:

Որոշման նախագիծը չի բխում ռազմավարական փաստաթղթերից:

Նշվում է, որ ակնկալում են հետևյալ արդյունքը:

««Հանրապետություն» մրցանակ սահմանելու մասին» Հայաստանի Հանրապետության կառավարության որոշման ընդունմամբ կներդրվի և կկիրառվի հանրապետության տնտեսության տարբեր ոլորտների զարգացմանը նպաստող՝ Հայաստանի Հանրապետության զարգացման գործում ներդրած ավանդի համար գնահատման ու պարգևատրման ևս մեկ համակարգ:

««Հանրապետություն» մրցանակ սահմանելու մասին» Հայաստանի Հանրապետության կառավարության որոշման ընդունման կապակցությամբ նոր իրավական ակտեր և գործող իրավական ակտերում փոփոխություններ կատարելու վերաբերյալ իրավական ակտեր ընդունելու անհրաժեշտություն չի առաջանում:

Մրցանակի մաս կազմող դրամական պարգևները, ինչպես նաև կրծքանշանի և համապատասխան վկայագրերի պատրաստման գումարները հատկացվելու են «Ռոբերտ Պողոսյան և որդիներ» հիմնադրամի կողմից:

««Հանրապետություն» մրցանակ սահմանելու մասին» Հայաստանի Հանրապետության կառավարության որոշման ընդունման կապակցությամբ Հայաստանի Հանրապետության պետական բյուջեում ծախսերի ու եկամուտների էական ավելացում կամ նվազեցում չի նախատեսվում։