ԵԽԽՎ-ում հայաստանյան ընդդիմադիր պատվիրակները հանդիպել են Հայաստանի հարցով զեկուցողներին Ստրասբուրգում
ԵԽԽՎ լիագումար նիստին ներկա գտնվող Ազգային ժողովի «Պատիվ ունեմ» խմբակցության պատգամավոր Հայկ Մամիջանյանը, «Հայաստան» խմբակցության պատգամավորներ Արմեն Գևորգյանն ու Արմեն Ռուստամյանը հանդիպել են Հայաստանի հարցով զեկուցողներ Բորիանա Աբերգին և Կիմմո Կիլյունեին։
Ընդդիմադիր պատվիրակները նրանց են ներկայացրել անցած ժամանակահատվածում համաժողովրդական շարժման գործողությունները, պահանջները, խոսել են Ղարաբաղյան հիմնախնդրի շուրջ հայ ժողովրդի` իրական կարմիր գծերի վերաբերյալ պատկերացումների մասին։
Զեկուցողներին են ներկայացվել նաև ոստիկանական բռնությունների, հատուկ միջոցների կիրառման մասին փաստեր, խոսել են նաև քաղբանտարկյալների մասին։ Հայաստանի հարցով զեկուցողները նաև տեղեկացվել են այսօր Ռուբեն Վարդազարյանի կողմից հրապարակված Բարձրագույն դատական խորհրդի նախագահի ժ/պ Գագիկ Զհանգիրյանի հետ զրույցի ձայնագրության բովանդակության, Ապարանի` մահվան ելքով կրակոցների, երկրում տարածվող ատելության մթնոլորտի մասին։
