«Հայաստան ժամանող ցանկացած պատվիրակություն պետք է ժողովրդի շունչը տեսնի ու զգա». Իշխան Սաղաթելյան
Այսօր Երևանում, օրվա առաջին կեսին, երբ տեղի էր ունենում ՀՀ և ՌԴ արտգործնախարարներ Սերգեյ Լավրովի և Արարատ Միրզոյանի հանդիպումը, ընդդիմությունը ՀՀ արտգործնախարարության մոտ բողոքի ակցիա էր անցկացնում։
Ֆրանսիայի հրապարակից քայլերթով դեպի ՀՀ արտգործնախարարություն գնալու և հենց այնտեղ ակցիա անցկացնելու նպատակն էր հայտարարությամբ մեկ անգամ ևս իրազեկել Ռուսաստանից Հայաստան ժամանած բարձրաստիճան պաշտոնյային, որ Նիկոլ Փաշինյանը կամ արտգործնախարարը մանդատ չունեն բանակցելու հայ ժողովրդի անունից։
ԱԺ փոխնախագահ, ՀՅԴ ԳՄ ներկայացուցիչ Իշխան Սաղաթելյանն ԱԳՆ շենքի մոտ լրագրողների հետ զրույցում ասաց, որ ելույթներով կփորձեն իրենց խոսքը տեղ հասցնեն։
«Մենք այստեղ ենք, որպեսզի ասենք, որ այն մարդու հետ, ում հետ բանակցում են, մանդատ չունի մեր ժողովրդի անունից բանակցելու ու իր հետ ձեռք բերված ցանկացած պայմանավորվածություն առոչինչ է, որովհետև ինքը չի արտահայտում հայ ժողովրդի շահերը։ Այսօր մեր նպատակը շենքը շրջափակելը չէ, մեր նպատակն ուղերձներ հասցնելն է։ Հայաստանում որքան էլ փորձեն ասել, թե ճգնաժամ չկա, Հայաստան ժամանող ցանկացած պատվիրակություն պետք է ժողովրդի շունչը տեսնի ու զգա»,- նշեց Իշխան Սաղաթելյանը։
Միաժամանակ նա ընդգծեց, որ Հայաստան ժամանող ցանկացած պատվիրակության դեպքում նպատակ չեն ունեցել, որպեսզի արգելեն նրանց մուտքը գերատեսչություններ, այլ պարզապես ցանկացել են իրենց ուղերձները տեղ հասցնել։
«Վերջին հաշվով այդ մարդիկ մեր երկրի հյուրերն են, մենք բոլորին էլ ասում ենք՝ բարով եք եկել, բայց ասում ենք՝ իմացեք, որ ում հետ բանակցում եք, ինքը կապ չունի մեր ժողովրդի ու նրա օրակարգի հետ։ Մեր նպատակն այն է, որ կարողանանք մեր խոսքը տեղ հասցնենք»,- եզրափակեց Իշխան Սաղաթելյանը։
