7 միլիոն ուկրաինացի փախստական կարող է հայտնվել ԵՄ-ում. եվրահանձնակատար
Ռուսական զորքերի ներխուժումից հետո Ուկրաինայի տարածքում տեղի ունեցող ռազմական գործողությունների հետևանքով Եվրոպա տեղահանված ուկրաինացիների թիվը կարող է կազմել մոտ 7 միլիոն մարդ։ Նման կանխատեսումներ է արել ԵՄ ճգնաժամային կառավարման հարցերով հանձնակատար Յանեշ Լենարչիչը։
Ելույթ ունենալով Բրյուսելում ԵՄ ներքին գործերի նախարարների՝ վերաբնակեցված ուկրաինացիների հոսքի վերաբերյալ հանդիպումից հետո կայացած մամուլի ասուլիսում, Լենարչիչը նշել է, որ, ըստ ՄԱԿ-ի, եթե պատերազմը շարունակվի, «մոտ 18 միլիոն ուկրաինացի թե՛ Ուկրաինայում, թե՛ հարևան երկրներում կտուժի հումանիտար առումով, գրում է korrespondent.net-ը:
Եվրահանձնակատարը հայտնել է, որ Մոլդովան Ուկրաինայից արդեն ընդունել է 25 հազար փախստականի, և ընդգծել է, որ բոլոր գնահատականները նախնական են, քանի որ փախստականների հոսքը շարունակվում է։
«Թվերը մեծ են, և մենք պետք է պատրաստվենք նման արտակարգ իրավիճակին, որը պատմական չափերի է»,- հավելել է նա։
Ինչպես հաղորդվում է, Ուկրաինա ռուսական ներխուժման սկզբից ի վեր երկիրը լքել է գրեթե 370 հազար մարդ, և այդ թիվը շարունակում է աճել։
