Իշխանազավթման փորձ, բռնաճնշումներ Վարդենիսում
Վարդենիսում այս պահին լարված իրավիճակ է: Քաղաքացիները փակել են փողոցներ՝ ի նշան Տեղական ինքնակառավարման մարմինների (ՏԻՄ) ընտրություններում իրենց ազատ կամարտահայտման վրա իշխանությունների կողմից բռնանալու փորձի:
168.am-ի տեղեկություններով՝ այս պահին դեռ ոստիկաններին չի հաջողվել բացել փողոցները:
Քիչ առաջ այդ առնչությամբ հայտարարություն էր տարածել «Միասնական Վարդենիս» կուսակցությունների դաշինքը:
Հայտարարության մեջ նշված էր, որ «Ահարոն Խաչատրյան» կուսակցությունների դաշինքը և «Միասնական Վարդենիս» կուսակցությունների դաշինքը Համագործակցության և համայնքում տեղական իշխանության մարմինները միասնաբար ձևավորելու մասին հայտարարություն են ստորագրել:
Հիշեցնենք, որ դեկտեմբերի 5-ին տեղի ունեցած ՏԻՄ ընտրությունների արդյունքներով՝ Վարդենիս խոշորացված համայնքում 12 մանդատ ստացել է «Քաղաքացիական պայմանագիրը», 10՝ «Ահարոն Խաչատրյան» կուսակցությունների դաշինքը, 5՝ «Միասնական Վարդենիս» կուսակցությունների դաշինքը:
«Իշխանությունները, սակայն, չհաշտվելով պարտության հետ և վարչական, դատական, ուժային մեթոդների կիրառմամբ, վախեցնելով ու զոռբայությամբ փորձում են նվաճել Վարդենիսի ավագանին: Հիշեցնենք՝ իշխանական գործիչներից մեկը՝ պատգամավոր Հայկ Սարգսյանը, հայտարարել է, որ ավագանու անդամները կարող են մտքափոխվել և ձայն տալ ՔՊ-ին:
Այժմ փորձ է արվում ԿԸՀ-ի միջոցով մեկ մանդատ խլել դաշինքներից՝ թվային հարաբերակցությունը դրանով դարձնելով 14/13: Սակայն 13 մանդատը ևս չի բավարարում ՔՊ-ին՝ համայնքապետ ընտրելու համար: Ելնելով դրանից՝ իշխանությունները փորձում են ձերբակալությունների միջոցով ստանալ ձայնային առավելություն: Քիչ առաջ այդ նպատակով ապօրինաբար ձերբակալել են «Միասնական Վարդենիս» կուսակցությունների դաշինքի ցուցակը գլխավորող Արամ Հարությունյանին: Իշխանությունների այս լկտի, ցինիկ վարքագիծը և բանեցվող բռնաճնշումները հուզումների տեղիք են տվել Վարդենիսի բնակչության շրջանում»,- գրված էր դաշինքի տարածած հայտարարության մեջ:
Ըստ էության իշխանությունները, չհաշտվելով Վարդենիսում պարտության հետ, վարչական, դատական, ուժային մեթոդների կիրառմամբ փորձում են նվաճել Վարդենիսի ավագանին: Հենց այդ նպատակով նրանք ձերբակալել են «Միասնական Վարդենիս» կուսակցությունների դաշինքի ցուցակը գլխավորող Արամ Հարությունյանին: Վերջինս այսօր կարող էր ու ըստ ամենայնի կդառնար Վարդենիս խոշորացված համայնքի ղեկավար:
Մանրամասները՝ տեսանյութում
