«Թալիբանը» և Հյուսիսային դաշինքը համաձայնության են եկել չհարձակվելու միմյանց վրա
«Թալիբան» արմատական շարժումը եւ Հյուսիսային դաշինքը (Աֆղանստանի փրկության միացյալ ճակատը) համաձայնության են եկել ձեռնպահ մնալու ռազմական գործողություններից եւ հարձակումներ չկատարելու միմյանց վրա: Օգոստոսի 26-ին այդ մասին հաղորդել է Geo TV հեռուստաալիքը՝ վկայակոչելով աղբյուրներ։
Նշվում է, որ կողմերը ձեռք բերված համաձայնությունների մասին օրվա ընթացքում կհայտարարեն մամուլի ասուլիսում: Աղբյուրների տվյալներով՝ «Թալիբանի» եւ Հյուսիսային դաշինքի պատվիրակությունների միջեւ հանդիպումները տեղի են ունեցել վերջին երկու օրվա ընթացքում Աֆղանստանի Փարվանի նահանգի Չարիքարում:
Սպասվում է, որ Հյուսիսային դաշինքի հետ «Թալիբանի» համաձայնությունը կարող է կանխել նրանց կողմնակիցների ընդհարումները Փանջշերի նահանգում, որը մնացել է թալիբների վերահսկողության ներքո չգտնվող՝ Աֆղանստանի միակ տարածաշրջանը, հաղորդել է ՏԱՍՍ-ը:
