Հունաստանում գրանցվել է COVID-19-ի դեմ պատվաստում ստացած քաղաքացու մահվան երկրորդ դեպքը
Հունաստանում գրանցվել է կորոնավիրուսի դեմ լրիվ պատվաստում ստացած մարդու մահվան երկրորդ դեպքը: Այս մասին հաղորդել է Հունաստանի ERT հանրային հեռուստատեսությունը:
Օգոստոսի 22-ի գիշերը Զակինտոս կղզու հիվանդանոցի ինտենսիվ թերապիայի բաժանմունքում մահացել է 77-ամյա մի տղամարդ: Նա կորոնավիրուսով հիվանդների համար նախատեսված բաժանմունք էր ընդունվել հուլիսի 30-ին, օգոստոսի 10-ից միացված է եղել արհեստական շնչառության սարքին, հաղորդել է հեռուստաալիքը:
«Տղամարդը պատվաստում ստացել էր, բայց նրա իմունիտետը չափազանց թույլ էր շատ լուրջ հիմնական հիվանդության պատճառով, որի դեմ, հիվանդանոցից ստացված տեղեկատվության համաձայն, նա ստացել է ուժեղ ներգործող դեղամիջոցներ, որոնք զգալիորեն ազդել են պատվաստանյութի արդյունավետության վրա»,- ասվում է հաղորդագրության մեջ:
Կորոնավիրուսի դեմ լրիվ պատվաստում ստացած եւ հիմնական հիվանդություններ չունեցող հիվանդի մահվան առաջին դեպքի մասին օգոստոսի 16-ին հայտնել է Սալոնիկի «Պապանիկոլաու» հիվանդանոցի ինտենսիվ թերապիայի երկրորդ բաժանմունքի տնօրեն Նիկոս Կապրավելոսը:
Նա դա բացառություն է համարել: Հունաստանում օրական հայտնաբերվում է կորոնավիրուսով ախտահարման ավելի քան 3000 դեպք:
Օգոստոսի 22-ի տվյալներով, երկրում համավարակի սկզբից ի վեր ախտահարվել Է գրեթե 560.000 մարդ, մահացել է 13․384 մարդ:
Մոտավորապես 11 մլն բնակչություն ունեցող երկրում արվել է կորոնավիրուսի դեմ 11,15 մլն պատվաստում: Առնվազն մեկ չափաբաժին ստացել է 5,9 միլիոն քաղաքացի, լրիվ պատվաստվել է 5,61 միլիոնը, հաղորդել է ՌԻԱ Նովոստին:
