Արգենտինայում նախագահի լուսանկարի պատճառով սկանդալ Է բորբոքվել

Արգենտինայի դաշնային դատախազությունը նախագահական նստավայր կատարած այցելությունների ցանկն է խնդրել լուսանկարի հրապարակումից հետո, որում պետության ղեկավար Ալբերտո Ֆերնանդեսը եւ առաջին տիկինը հյուրերին ընդունում են կարանտինի ժամանակ: Այս մասին ՌԻԱ Նովոստիին հայտնել են դատական շրջանակներում:

«Դատախազը պահանջել է այն մարդկանց ցուցակը, ովքեր ելումուտ են ունեցել նախագահական նստավայր», – ասել է գործակալության զրուցակիցը:

Վերջին մի քանի օրերին արգենտինական տարբեր ԶԼՄ-ներում հրապարակվել են երկրի առաջին տիկնոջ ծննդյան օրվա տոնակատարության լուսանկարները, որոնցում 12 մարդ է պատկերված սեղանի շուրջ: Նրանք առանց դիմակների էին եւ չեն պահպանել սոցիալական հեռավորությունը:

TN հեռուստաալիքն ավելի վաղ հայտնել էր, որ լուսանկարներն արվել են նախագահական նստավայրում անցյալ տարվա հուլիսին, երբ երկրում արգելված էին որեւէ հանդիպումներ եւ գործում էր խիստ կարանտին:

Երկրի կառավարության ղեկավար Սանտյագո Կաֆիերոն Radio 10-ին տված հարցազրույցում տեղի ունեցածը սխալմունք է անվանել։ Ֆերնանդեսը դեռ չի արտահայտվել այդ հարցի շուրջ։

Ընդդիմության պատգամավորներն արդեն հայտարարել են, որ մտադիր են պահանջել նախագահի հրաժարականը։