Թուրքիայի բնական աղետները կտրուկ նվազեցրել են իշխող քաղաքական ուժերի վարկանիշը

Թուրքական «Aksoy Araştırma» ընկերությունը փորձել է պարզել՝ ում կընտրեն քաղաքացիները, եթե այս կիրակի այդ երկրում ընտրություններ լինեն։ Այս մասին տեղեկացնում է ermenihaber.am-ը։

Ըստ անցկացված հարցումների՝ վերջին շաբաթների ընթացքում Թուրքիայում մոլեգնող բնական աղետներն ու դրանց դեմ իշխանությունների անբավարար պայքարը լուրջ ազդեցություն են ունեցող ընտրողների դիրքորոշման վրա։ Մասնաորապես իշխող «Հանրապետական դաշինքի» դիրքերը զգալիորեն նահանջել են։

Հարցումների մասնակիցների միայն 38․6 տոկոսն է նշել, որ այս շաբաթ ընտրություններ կազմակերպվելու դեպքում իր քվեն կտար իշխող դաշինքին։ Իսկ 42 տոկոսը նախապատվություն է տվել «Millet» դաշինքին։ Այս երկու դաշինքներից ոչ մեկի կազմի մեջ չմտնող «Ժողովուրդների դեմոկրատական» կուսակցությանն (ԺԴԿ-HDP) իր քվեն տալու պատրաստակամություն է հայտնել մասնակիցների 9․3 տոկոսը։ Հարցվածների 13․8 տոկոսն էլ նշել է, որ դեռ չի կողմնորոշվել կամ նախընտրում է չբարձրաձայնել, թե ում կընտրեր։

«Հանրապետական դաշինքի» անդամ, իշխող «Արդարություն և զարգացում» կուսակցությանը (ԱԶԿ-AKP) նախապատվություն է տվել ընտրողների 30․6 տոկոսը, դաշինքի մեկ այլ անդամի՝ «Ազգայնական շարժում» կուսակցության (ԱՇԿ-MHP) օգտին քվեարկելու պատրաստակամություն է հայտնել ընտրողների 8 տոկոսը։ Իսկ ընդդիմադիր Ժողովրդահանրապետական կուսակցությունը (ԺՀԿ-CHP) ստացել է պոտենցիալ ընտրողների 28․7 տոկոսի աջակցությունը։