ԱԺ-ում արգելել են լրագրողների մուտքը հենց իրենց համար հատկացված օթյակներ
Խորհրդարանում «Իմ քայլը» և «Հայաստան» խմբակցությունների միջև տեղի ունեցած միջադեպից հետո, խորհրդարանի աշխատանքը լուսաբանող լրագրողների մուտքը՝ հենց լրագրողների համար նախատեսված օթյակներ, արգելվել է: Այն լրագրողները, որոնք առավոտյան օթյակում էին և այտեղից էին հետևում նիստերի դահլիճում ընթացող աշխատանքներին, չեն կարողանում մուտք գործել շարունակելու աշխատանքը, նույնիսկ այն ժամանակ, երբ արդեն կրքերը հանդարտվել էին:
Հիշեցնենք՝ «Իմ քայլը» և «Հայաստան» դաշինքի պատգամավորների միջև տեղի ունեցավ լեզվակռիվ և միմյանց հասցեին հնչեցին փոխադարձ վիրավորանքներ ու մեղադրանքներ, որից հետո Ալեն Սիմոնյանը նիստերի դահլիճ հրավիրեց անվտանգության աշխատակիցներին, ապա հորդորեց անջատել ուղիղ եթերը: Դրանից հետո անվտանգության աշխատկիցները նաև լրագրողներին հորդորեցին դուրս գալ օթյակից, որտեղ մեծ մասամբ աշխատում են հեռուստատեսության լրագրողները, արգելելով նրանց որևէ նկարահանում կատարել: Հայտարարվեց ընդմիջում, որից հետո լրագրողների մուտքն օթյակներ արգելվեց:
Այս ամենն ունի մեկ նպատակ, որպեսզի լրագրողները հնարավորություն չունենան տեսանկարահանել ու լուսանկարել այն ամենը, ինչ տեղի է ունենում նիստերի դահլիճում:
