«Արմավիր» քրեակատարողական հիմնարկում կանխվել է առանձնապես խոշոր չափերի թմրամիջոցների փոխանցումը
Հայաստանի Հանրապետության ազգային անվտանգության ծառայությունում ստացված օպերատիվ տվյալների հիման վրա 2021 թվականի օգոստոսի 2-ին, ժամը 16:35-ի սահմաններում, ՀՀ արդարադատության նախարարության «Արմավիր» քրեակատարողական հիմնարկի ծառայողները զննության են ենթարկել դատապարտյալ Կ. Վ.-ի մոտ տեսակցության եկած քաղաքացի Ա. Ա.-ին: Այս մասին տեղեկացնում են Քրեակատարողական ծառայության հանրային կապերի բաժնից:
Զննության ընթացքում ոչինչ չեն հայտնաբերել: Ծառայողներն Ա. Ա.-ի հետ իրականացրել են բացատրական աշխատանքներ, ինչի արդյունքում վերջինս ինքնակամ հետանցքից հանել է պոլիէթիլենային փաթեթ, որում առկա են եղել 5,02 գրամ քաշով հերոին տեսակի, 5,91 գրամ քաշով մեթամֆետամին տեսակի և 3,86 գրամ քաշով մարիխուանա տեսակի թմրամիջոցներին նմանվող առանձնացված զանգվածներ:
Փաստի առթիվ նախապատրաստվում են նյութեր, նշանակվել է դատաքիմիական փորձաքննություն:
