Թուրքիայում ընդդիմադիր կուսակցապետը դատի է տվել իշխանամետ լրագրողին
Թուրքիայի գլխավոր ընդդիմադիր «Ժողովրդահանրապետական» կուսակցության (CHP-ԺՀկ) նախագահ Քեմալ Քըլըչդարօղլուն դատի է տվել թուրքական իշխանամետ «Յենիշաֆաք» թերթի սյունակագիր, նույն թերթի նախկին խմբագիր Իբրահիմ Քարագյուլին: Այս մասին տեղեկացնում է ermenihaber.am-ը։
Պատճառն այն է, որ լրագրողը ընդդիմադիր կուսակցությանը՝ ԺՀԿ-ին մեղադրել էր Թուրքիայում ահաբեկչական համարվող «Քուրդիստանի բանվորական կուսակցության» (PKK-ՔԲԿ) հետ միասին գործելու մեջ, իսկ Քըլըչդարօղլուի հասցեին վիրավորանք էր հնչեցրել:
Լրագրողը սոցցանցում մասնավորապես գրել էր. «ԺՀԿ-ն անտառային հրդեհների հարցում ՔԲԿ-ի հետ միասին է գործել: Սա շատ կեղտոտ դաշինք է: Քըլըչդարօղլուն ազգային անվտանգության հարց է»:
Նշվում է, որ ընդդիմադիր կուսակցապետի փաստաբան Ջելալ Չելիքը Քարագյուլի դեմ դատական հայց է ներկայացրել՝ պահանջելով Քըլըչադրօղլուին 100.000 թուրքական լիրայի չափով բարոյական վնասի փոխհատուցում վճարել:
