Բերման ենթարկված տղամարդը ձերբակալվել է
Օգոստոսի 1-ի գիշերը ոստիկանության Սևանի բաժնի քրեական հետախույզները մեկնեցին Երևան. տեղեկություն էին ստացել, որ գողության մեղադրանքով հետախուզվող 49-ամյա տղամարդը մայրաքաղաքում է։
Նրանք ժամը 23-ին հետախուզվողին բերման ենթարկեցին Սևանի բաժին։ Տղամարդը հայտնաբերվել էր Դանիել Վարուժանի փողոցում։ Բաժնում նա խուզարկվեց։ Հայտնաբերվեց դրամապանակ, որի մեջ կնոջ անվամբ տարբեր բանկերի քարտեր էին, ինչպես և բժշկական ապահովագրության քարտ, փող և այլն։ Պարզվեց, որ բերման ենթարկվածը դրամապանակը գողացել էր Դանիել Վարուժանի փողոցի բժշկական կենտրոնից։
Ըստ նրա՝ պայուսակը, որի միջից գողացել էր դրամապանակը, դրված էր եղել բժշկական կենտրոնի 1-ին հարկի միջանցքի պատուհանագոգին։
Սևանի ոստիկանները, համագործակցելով Մալաթիայի բաժնի գործընկերների հետ, կապ են հաստատել դրամապանակի տիրոջ հետ՝ իրերը վերադարձնելու համար։ Բերման ենթարկված տղամարդը ձերբակալվել է։
