Գերմանիան պաշտոնապես ճանաչել է հերերո և նամա ցեղերի ցեղասպանությունը և ներողություն խնդրել
Գերմանիան 20-րդ դարի սկզբին գերմանական գաղութային զորքերի կողմից ներկայիս Նամիբիայի տարածքում հերերո և նամա ցեղերի ոչնչացումը պաշտոնապես ճանաչել է ցեղասպանություն և ներողություն խնդրել զոհերի ժառանգներից: Այս մասին հայտնել է Գերմանիայի արտաքին գործերի նախարար Հայկո Մաասը:
Մաասը հայտարարել է, որ ավելի քան հինգ տարվա բանակցությունների արդյունքում Գերմանիան և Նամիբիան համաձայնության են հասել համատեղ պատմության ամենամռայլ էջը գնահատելու շուրջ, հավելելով, որ որպես անասելի տառապանքների ճանաչման քայլ Գերմանիան Նամիբիային միլիոնանոց օգնություն կհատկացնի երկրի զարգացման համար:
Նամիբիան -նախկինում գերմանական Հարավ-Արեւմտյան Աֆրիկան Գերմանիայի գաղութն էր 1884-ից մինչեւ 1915 թվականը: 1904-1908 թվականներին կայսերական Գերմանիայի զորքերը ոչնչացրել են հերերո և նամա ցեղերի տասնյակ հազարավոր ներկայացուցիչների։
Պատմաբանները դա անվանել են 20-րդ դարի առաջին ցեղասպանությունը:
