Genesis Armenia համահայկական գիտավերլուծական հիմնադրամ ուղեղային կենտրոնը խստորեն դատապարտում է ՀՀ տարածք ներխուժած Ադրբեջանի ԶՈւ սադրիչ գործողությունները
Genesis Armenia համահայկական գիտավերլուծական հիմնադրամ ուղեղային կենտրոնը խստորեն դատապարտում է Հայաստանի Հանրապետության (Հայաստան, ՀՀ) դեմ Ադրբեջանի Հանրապետության (Ադրբեջան, ԱՀ) շարունակվող զինված հարձակումը, ՀՀ տարածք ներխուժած Ադրբեջանի ԶՈւ ստորաբաժանումների սադրիչ և սպառնալից գործողությունները, դրանք համարում՝
1- միջազգային իրավունքի հիմնարար սկզբունքների, նորմերի ու միջպետական հարաբերությունների կոպտագույն խախտում,
2- ԱՀ և նրա դաշնակից Թուրքիայի՝ պետականորեն կազմակերպված, համակարգված և իրագործված հակահայ քաղաքականության շարունակություն,
3- ՀՀ անվտանգության ապահովմանն ուղղված ՀՀ իշխանության անկարողության ու անգործության դրսևորում, անպատասխանատու, չհաշվարկված և ոչ հետևողական քաղաքականության արդյունք, որն իրական սպառնալիք է հայկական զույգ պետությունների և հայության գոյության համար:
Հիմք ընդունելով, որ՝
– ՀՀ իշխանության ստորագրած ցանկացած փաստաթուղթ կամ միջազգային պայմանագիր, որն իր բնույթով քաղաքական է կամ վերաբերվում է մարդու իրավունքների պաշտպանությանը պետք է ներկայացնել ՍԴ, այնուհետև ԱԺ քննարկմանը, իսկ ՀՀ ինքնիշխան և տիտղոսային տարածքների փոփոխության վերաբերյալ փաստաթղթերը կարող են ստորագրվել միայն հանրաքվեից հետո,
– ՀՀ և նրա քաղաքացիների անվտանգությանն առնչվող ցանկացած գաղտնի պայմանավորվածության կամ արկածախնդիր հայտարարության իրագործումը չափազանց ռիսկային է և պարունակում է անվտանգային անդառնալի կորուստներ,
– 2021 թ. մայիսի 17-ին ՀՀ ԱԺ-ում և Կառավարությունում ՀՀ վարչապետի ժամանակավոր պաշտոնակատարի արած բանավոր հայտարարությունը, թե պատրաստվում է Ադրբեջանի նախագահի հետ ստորագրել երրորդ հայտարարություն, որով ՀՀ և ԱՀ միջև տեղի է ունենալու գծանշում և տեղորոշում (դեմարկացիա և դելիմիտացիա),
– ՀՀ միջպետական հարաբերությունների կարգավորման համատեքստում սահմանների անձեռնմխելիության վերաբերյալ ՀՀ Բարձր դատարանը՝ ՍԴ-ն, ունի նախադեպային որոշում՝ 2009 թ. ՀՀ-Թուրքիա դիվանագիտական հարաբերությունների հաստատման և միջպետական հարաբերությունների կարգավորման վերաբերյալ,
Genesis Armenia-ն ՀՀ իշխանությունից պահանջում է՝
– Անհապաղ դադարեցնել 2020 թ. նոյեմբերի 9-ին հրապարակված, ՀՀ, Արցախի և հայ ժողովրդի ազգային-պետական շահերը չսպասարկող հայադավ Հայտարարության (Միջազգային պայմանագրի, Փաստաթղթի) հրապարակված և գաղտնի պահվող (մասնակի կամ ամբողջական) կետերի կամ բանավոր պայմանավորվածությունների իրականացման ընթացքը:
– ՑԱՆԿԱՑԱԾ տարբերակով անհապաղ միջոցներ ձեռնարկել՝ ՀՀ տարածք ներխուժած Ադրբեջանի ԶՈւ ստորաբաժանումների դուրսբերման համար։
– Դիմել ՄԱԿ-ի Անվտանգության խորհուրդ և ապահովել անվտանգային համապատասխան բանաձև, որը կստիպի ագրեսոր Ադրբեջանին՝ զորամիավորումներն անհապաղ դուրս բերել ՀՀ տարածքից և/կամ հայտարարել համազգային մոբիլիզացիա և պատրաստվել՝ դիմակայելու ՀՀ միջազգային իրավասուբյեկտայնությունը վիճարկող, ՀՀ տարածքային ամբողջությունը ոտնահարող ագրեսորին:
– Դադարեցնել ՀՀ և ԱՀ միջև գծանշման և տեղորոշման աշխատանքներն սկսելու վերաբերյալ խորհրդակցությունները կամ պայմանավորվածությունները, դրանք դարձնել հրապարակային, ստուգել նման հայտարարությունների սահմանադրականությունը:
– Տարածաշրջանում կոմունիկացիաներն ապաշրջափակելու ԱՀ պաշտոնական հայտարարություններն ընդունել ի գիտություն, սառեցնել ՀՀ մասնակցությունը դրանց իրագործմանը կամ գաղտնի քննարկումները նվազագույնը մինչև Ադրբեջանի զորքերի դուրսբերումը ՀՀ սահմաններից և այդ հարցերի հայաստանանպաստ և հայանպաստ լուծումների քննարկումը թողնել ՀՀ-ում սպասվող արտահերթ խորհրդարանական ընտրություններից հետո ձևավորվող իշխանությանը՝ բացառելով նման քննարկումների իրականացումը պարտված կառավարության կողմից՝ օտարերկրյա պետության կողմից ուժի սպառնալիքի ներքո:
– ՀՀ և Արցախի Սահմանադրություններով ամրագրված այն տարածքները, որոնք 2020 թ. սեպտեմբերի պատերազմի հետևանքով անցան Ադրբեջանի հսկողության տակ, դրանք համարել օկուպացված՝ մինչև Արցախի կարգավիճակի վերջնական հստակեցումը:
