«Սահմանը գյուղից շատ հեռու է, չեմ հասկանում՝ ինչի մասին է խոսքը». Ակունքի գյուղապետը հերքում է թշնամու առաջ գալը
Մայիսի 12-ից սկսած ադրբեջանական զինուժը Գեղարքունիքի մարզի 7 գյուղերի ուղղությամբ առաջ է եկել, նման տեղեկատվություն տարածել էր ArmLur.am-ը և կից հրապարակել գյուղերի ցանկը՝ Կութ, Նորաբակ, Վերին Շորժա, Ներքին Շորժա, Ակունք, Այրք` Թարսի բլուր, Ջաղացաձոր:
168.am–ի հետ զրույցում Ակունք գյուղի ղեկավար Նիկոլա Խաչատրյանը հերքեց այդ լուրը՝ նշելով, որ թշնամին գյուղին չի մոտեցել։
«Սահմանը գյուղից շատ հեռու է, ես չեմ հասկանում՝ ինչի մասին է խոսքը։ Գյուղն էլ, ժողովուրդն էլ իրենց կյանքով հանգիստ ապրում են, իրենց բանուգործին են»,- նշեց Ակունքի գյուղապետը։
Նա նաև նշեց, որ գյուղի մշակովի հողատարածքները, մարդկանց սեփականաշնորհված հողակտորները սահմանին մոտ չեն, իրենք հանգիստ իրենց հողն են մշակում ու սովորական առօրյայով ապրում։
Հիշեցնենք՝ մայիսի 12-ին թշնամին խախտելով հայ-ադրբեջանական սահմանը՝ մի քանի կիլոմետր Սյունիքի, Գեղարքունիքի մարզերի հատվածներում առաջ է եկել, մինչ օրս նրանք առաջ եկած հատվածներում են և հետ չեն գնում։ Սյունիքում մի քանի անգամ անցկացվել են բանակցություններ, որպեսզի թշնամին հետ գնա, սակայն ապարդյուն։ Հարակից գյուղերի ղեկավարներն ու բնակիչներն ասում են, որ թշնամու զինվորներն ինչ-որ քարտեզներով են առաջ եկել, և պնդում են, թե վերադասից հրաման են ստացել, որ առաջ գան, քանի որ համարում են, որ այդ տարածքներն ադրբեջանական են։
