Աբսուրդի թատրոն իրավապահ համակարգում. հրաժարվում են զինգրքույկում գրել, որ մասնակցել են պատերազմին. «Իրավունք»
«Իրավունքի» ունեցած տեղեկությունների համաձայն, լարված իրավիճակ է տիրում իրավապահ համակարգում: Խնդիրն այն է, որ արցախյան 44-օրյա պատերազմի մասնակիցների զինգրքույկում հրաժարվում են գրել, որ նրանք մասնակցել են պատերազմին եւ խնդիրներ են ստեղծում նաեւ վիրավորներին հաշմանդամության կարգ սահմանելու հարցում:
Հիշեցնենք, որ պատերազմի օրերին իրեն Գերագույն գլխավոր հրամանատար երեւակայած Նիկոլ Փաշինյանը կոչով հանդես եկավ, որպեսզի ձեւավորվեն կամավորական ջոկատներ, որոնք կիրականացնեն հայ ժողովրդի իրավունքի պաշտպանության գործը: Դրանից հետոª կամավորական, բայց պարտադիր ջոկատներ կազմվեցին նաեւ իրավապահ համակարգից:
Բայց արի ու տես, որ այն ժամանակ սպառնում էին, թե պատերազմ չմեկնողների վրա քրգործեր կհարուցվեն, հիմա էլ ասում են, թե ոչ մեկ իրավունք չուներ լքել ծառայությունն իրավապահ համակարգում եւ մեկնել պատերազմ: Հետեւաբար, խնդիրներից խուսափելու համար ավելի լավ է չնշել զինգրքույկում պատերազմի մասնակցության մասին:
Այս ողջ աբսուրդի թատրոնը կարող էր ծիծաղելի թվալ, եթե իրավիճակի զոհերը չունենային առողջական խնդիրներ եւ կարիք, որ իրենց էլ հիշեն՝ որպես պատերազմի մասնակից, հատկապես, որ ո°չ թաքուն են գնացել, ո°չ էլ կամավոր, այլ՝ պարտադիր»:
