Վրաստանում «Բորժոմ» գործարանի աշխատողները պահանջել են բարձրացնել աշխատավարձերը
Վրաստանի «Բորժոմ» գործարանի աշխատողները գործադուլ են հայտարարել եւ ակցիայի դուրս եկել՝ պահանջելով բարձրացնել աշխատավարձերը: Այդ մասին հաղորդել է վրացական Առաջին ալիքը:
«Բորժոմ» գործարանի աշխատողներն անցկացնում են ակցիա: Աշխատանքային գործընթացը դադարեցվել է առավոտվանից: Գործարանի մոտ հավաքվել են Բորժոմի առաջին եւ երկրորդ լցման գործարանի աշխատողները: Ընկերության գործադուլավոր աշխատողները պահանջում են աշխատավարձի բարձրացում, հանգստյան օրեր եւ արտաժամյա աշխատանքի վարձատրություն:
Գործարանի բանվորներն ասում են, որ ընկերությունը նվազեցրել է աշխատավարձերը, այն կրճատելով գրեթե 50 տոկոսով՝ հաշվի առնելով ինֆլյացիայի մակարդակը»,-ասվում է ալիքի կայքում զետեղված հաղորդագրության մեջ: Ինչպես նշում է ալիքը, օրերս «Բորժոմ» ընկերության գործադուլավոր աշխատողները հանդիպել են վարչակազմի ներկայացուցիչների հետ: Աշխատակիցները գործարանի վարչակազմին նախազգուշացրել են, որ իրենց փոխարինող գտնելու փորձը դիմակայություն կառաջացնի, իսկ դրա համար պատասխանատվությունը կկրի ընկերությունը, հաղորդել է ՌԻԱ Նովոստին:
