Ամասիայում եկեղեցի է կառուցվելու
Հայաստանի հյուսիսում՝ սահմանամերձ Ամասիայում կառուցվում է եկեղեցի: Եկեղեցին տարածաշրջանում կլինի եզակի:
Տարիներ շարունակ, բացառությամբ Բանդիվանի, նախկին Ամասիայի տարածաշրջանի գյուղերում եկեղեցիներին փոխարինել են մատուռներն ու սրբատեղիները: Հենց Ամասիայում որպես աղոթատեղի ծառայել է կենցաղ-կոմբինատի նախկին շենքը, որի մի հատվածն անկախության տարիներին տրվել է Շիրակի թեմին։
Ամասիայում եկեղեցի կառուցելու նախաձեռությամբ հանդես է եկել Սյունիքի նախկին մարզպետ Վահե Հակոբյանը, ով «Արմենպրես»-ի հետ զրույցում նշեց, որ ամեն ինչ անելու է, որ մեկ տարվա ընթացքում եկեղեցին պատրաստ լինի։ «Ես պետք է խոստովանեմ, որ չգիտեի, որ Ամասիայի տարածաշրջանում եկեղեցի չկա և տեսնելով այն տարածքը, որտեղ մարդիկ իրենց աղոթքն անում են, որոշեցինք հենց այստեղ եկեղեցի կառուցել, որպես Հայաստանի ամենահյուսիսային կետ՝ ցույց տալով նաև Հայաստանի հյուսիսի և հարավի միասնականությունը»,- նշեց Վահե Հակոբյանը:
