ԱՄՆ-ի զորքերը լքել են Աֆղանստանում մեծությամբ երկրորդ ռազմակայանը
ԱՄՆ-ի հրամանատարությունն այս շաբաթ իր զինծառայողներին դուրս է բերել ռազմաօդային ուժերի խոշոր ռազմակայանից, որը գտնվում է Աֆղանստանի հարավի Ղանդահարի նահանգում: Այդ մասին մայիսի 14-ին հաղորդել են արեւմտյան ԶԼՄ-ները՝ վկայակոչելով այս նահանգում աֆղանական բանակի ներկայացուցիչ Խոջու Ալային։
«Նա (ԱՄՆ-ը) մեզ պաշտոնապես չի հանձնել ռազմակայանը, բայց ես կարող եմ հաստատել, որ նրանք ռազմաբազայից դուրս են եկել չորեքշաբթի օրը՝ մայիսի 12-ին»,-ասել է աֆղանական բանակի ներկայացուցիչը: Իր հերթին Ղանդահարի օդանավակայանի ղեկավար Մասուդ Փաշթունը նշել է, որ ռազմաբազայի բոլոր օբյեկտներն անցել են աֆղանական ուժերի կառավարմանը:
Ալան եւ Փաշթունը նաեւ հաղորդել են, որ ռազմակայանի՝ աֆղանական ուժերի կառավարմանը հանձնելու պաշտոնական արարողությունը պետք է անցկացվի Իդ ալ-Ֆիթր տոնի վերջանալուց հետո, որը նշանավորում է իսլամական Ռամադան սուրբ ամսվա ավարտը. ամիսը վերջանում է շաբաթ օրը՝ մայիսի 15-ին:
ԶԼՄ-ները նշում են, որ այդ օդակայանն ավելի վաղ եղել է ԱՄՆ-ի եւ միջազգային կոալիցիայի՝ մեծությամբ երկրորդ ռազմակայանը երկրում: Դրա հետ մեկտեղ, հիշեցնում են ԶԼՄ-ները, Ղանդահարի նահանգը «Թալիբան» շարժման օրրանն է, եւ այդ նահանգում վերջին ամիսներին ինտենսիվ մարտեր են դիտվում թալիբների եւ Աֆղանստանի կառավարական ուժերի միջեւ: ԱՄՆ-ի եւ ՆԱՏՕ-ի գծով նրա դաշնակիցների ուժերը սկսել են հեռանալ Աֆղանստանից: Պլանավորվում էոր այդ գործընթացը կավարտվի մինչեւ 2021 թվականի սեպտեմբերի 11-ը: Ամերիկյան նախկին վարչակազմը պլանավորել էր Աֆղանստանից զորքերը դուրս բերել մինչեւ մայիսի 1-ը, հաղորդել է «Ինտերֆաքս»-ը:
