ՀՀ-ն դիմել է ՀԱՊԿ՝ պայմանագրի 2-րդ հոդվածի հիման վրա. այսինքն՝ Սյունիքի և Գեղարքունիքի մարզ թշնամու ներխուժումը ՀՀ իշխանությունը ներկայացնում է ոչ թե որպես ագրեսիա, այլ՝ որպես սպառնալիք. Գոհար Մելոյան
Փաշինյանի ելույթի տեսաձայնագրությունից ակնհայտ է, որ Հայաստանը ՀԱՊԿ դիմել է ոչ թե Հավաքական անվտանգության պայմանագրի 4-րդ հոդվածի, որը վերաբերում է այն դեպքերին, երբ Հավաքական անվտանգության պայմանագրի անդամ պետությունը ենթարկվել է ագրեսիայի, այլ՝ 2-րդ հոդվածի հիման վրա, որը վերաբերում է այն դեպքերին, երբ Հավաքական անվտանգության պայմանագրի անդամ պետությունը ենթարկվում է անվտանգության, կայունության կամ տարածքային ամբողջականության հետ կապված սպառնալիքի։ Այս մասին ֆեյսբուքյան իր էջում գրել է սահմանադրագետ Գոհար Մելոյանը:
«Ընդ որում՝ ի տարբերություն 2-րդ հոդվածի, որը ենթադրում է զուտ խորհրդատվությունների նախաձեռնում, 4-րդ հոդվածը նախատեսում անմիջապես ռազմական օգնության տրամադրում։
Այսինքն, Սյունիքի հատվածում 3.5 կմ, իսկ որոշ գնահատականների համաձայն՝ 5 կմ խորությամբ թշնամական ուժերի ներխուժումը, և դրան զուգահեռ Գեղարքունիքի մարզի վարչական տարածք ներխուժումը ՀՀ իշխանությունն իր դաշնակիցներին ներկացնում է ոչ թե որպես ագրեսիա ուղղված Հայաստանի Հանրապետության դեմ, այլ, զուտ, որպես սպառնալիք ՀՀ անվտանգության, կայունության կամ տարածքային ամբողջականության դեմ»,- գրել է նա:
