Ո՞ր մթերքները կարող են ինսուլտ առաջացնել․ բժիշկ Ալեքսանդր Կարասև
Կարմիր մսի, պանրի և ձվի չարաշահումը 45-ից բարձր տարիքի անձանց մոտ կարող է հանգեցնել ինսուլտի և թրոմբոզի: РИА Новости գործակալության փոխանցմամբ՝ այս մասին «Говорит Москва» ռադիոկայանի եթերում ասել է կլինիկական լաբորատոր ախտորոշման բժիշկ Ալեքսանդր Կարասևը:
Բժիշկը հորդորել է շաբաթը երկու անգամից ավելի կարմիր միս չուտել, բաժինը չպետք է գերազանցի 150 գրամը:
Ըստ նրա՝ որոշ բակտերիաներ վերոնշյալ սննդամթերքներում կարող են շատ թունավոր միացություն ստեղծել:
«Դա կոչվում է տրիմեթիլամին: Մեր լյարդը փորձում է ազատվել դրանից` օքսիդացնելով այն. միացությունը կոչվում է ՏՄԱՕ: Այն ուղղակիորեն վնասում է էնդոթելիումը»,- բացատրել է բժիշկը:
Կարասևը նշել է, որ էնդոթելիումի վնասումը, գլյուկոզի տատանումների հետ մեկտեղ, հանգեցնում է աթերոսկլերոտիկ վահանիկի առաջացման: Աթերոսկլերոտիկ վահանիկի շուրջ սկսվում է արյան անհանգիստ շարժում, որը հանդիսանում է թրոմբոզի, իսկ հետագայում՝ ինսուլտի և սրտի կաթվածի պատճառ:
