ԱՄՆ-ը հայտարարել է, որ Ռուսաստանի հետ ավելի կայուն հարաբերությունների հույս ունի
Միացյալ Նահանգները կցանկանար ավելի կանխատեսելի հարաբերություններ Ռուսաստանի հետ: Այդ մասին հայտարարել է ԱՄՆ-ի պետքարտուղար Էնթոնի Բլինկենը BBC հեռուստառադիոհաղորդումների կորպորացիային տված հարցազրույցում, որից հատվածներ են հրապարակվել մայիսի 6-ին։
«Մենք կգերադասեինք ավելի կայուն եւ կանխատեսելի հարաբերություններ»,- ասել է նա:
Յոթի խմբի (G7) արտաքին քաղաքական գերատեսչությունների ղեկավարները մայիսի 5-ին Լոնդոնում ավարտված գագաթնաժողովի արդյունքներով հայտարարել են, որ կշարունակեն փոխգործակցել Ռուսաստանի հետ տարածաշրջանային ճգնաժամերի կարգավորման գործում: Հանդիպումները տեղի են ունեցել մայիսի 2-ից մինչեւ 5-ը՝ Միացյալ Թագավորության նախագահությամբ, դրանց մասնակցել են Մեծ Բրիտանիայի, Գերմանիայի, Իտալիայի, Կանադայի, ԱՄՆ-ի, Ֆրանսիայի եւ Ճապոնիայի ներկայացուցիչները եւ Եվրամիության արտաքին գործերի եւ անվտանգության քաղաքականության գերագույն ներկայացուցիչը, հաղորդել էԷ ՏԱՍՍ-ը:
