Մեզ համար պետք է պարզ լինի, որ այդ պայմանավորվածությունը տեղի է ունեցել հենց քաղաքացի Փաշինյան Նիկոլի և Ադրբեջանի բարձրագույն իշխանության միջև. Իրավապաշտպան
«Նախագահ Սարգսյանն ընդգծել է, որ Ադրբեջանի ու Հայաստանի միջև պաշտոնապես սահմանագծում ու սահմանազատում կատարված չեն, ինչը նշանակում է, որ պետական սահմանների որոշման գործընթացն իրավական տեսանկյունից այս պահին առնվազն անորոշ է»,- սա հատված է ՀՀ նախագահ Արմեն Սարգսյանի և ՄԻՊ Արման Թաթոյանի երեկ կայացած հանդիպման մասին հաղորդագրությունից։
Իհարկե, նորություն չէ, որ նախագահն իր հայտարարություններում միշտ արձանագրողի դերում է, իսկ հայտարարություններն այնքան անորոշ են, ինչքան իր սահմանադրական լիազորությունները:
Ստեղծված իրավիճակում ի՞նչ պետք է աներ ՀՀ նախագահը, բացի Սյունիքում սահմանազատման գործընթացների վերաբերյալ առանց այդ էլ ընդգծված խնդիրն «ընդգծելը»՝ 168.am-ը հետաքրքրվեց «Ընդդեմ կամայական բռնության» ՀԿ նախագահ, իրավապաշտպան Լարիսա Ալավերդյանից:
Ի պատասխան՝ Լարիսա Ալավերդյանն անդրադարձավ ՀՀ նախագահին սահմանադրորեն վերապահված լիազորություններին. «Ճիշտն ասած, նախագահի սահմանադրական լիազորություններն այնքան աղոտ են գրված. գրված է միայն՝ «հետևել»:
Կարծում եմ, վաղուց հենց նախագահը կամ իր իրավաբանական ծառայությունը պետք է դիմեր, օրինակ, նույն Սահմանադրական դատարան՝ հստակեցնելու՝ արդյո՞ք նա կարող է դիմել ՍԴ, որպեսզի կա՛մ կանգնեցնի, կա՛մ անօրինական ճանաչի այդ գործընթացը, որն արդեն եղել է»:
Հիշեցնենք՝ Սահմանադրության 123-րդ հոդվածը սահմանում է.
«1. Հանրապետության նախագահը պետության գլուխն է:
- Հանրապետության նախագահը հետևում է Սահմանադրության պահպանմանը:
- Հանրապետության նախագահն իր լիազորություններն իրականացնելիս անաչառ է և առաջնորդվում է բացառապես համապետական և համազգային շահերով:
- Հանրապետության նախագահն իր գործառույթներն իրականացնում է Սահմանադրությամբ սահմանված լիազորությունների միջոցով»:
Հանրապետության նախագահի լիազորություններն ամրագրված են Սահմանադրության 5-րդ գլխում, ինչպես նաև Սահմանադրության 93-րդ, 149-րդ, 150-րդ, 155-րդ, 166-րդ, 169-րդ, 206-րդ հոդվածներով:
Հարցին, թե սահմանազատման գործընթացների ու դրա հետևանքով առաջացած անվտանգային խնդիրների մասին շարունակ բարձրաձայնվում է, ինչո՞ւ են իշխանություններն անհաղորդ խնդրին, իրավապաշտպանը պատասխանեց.
«Շատ լավ էլ հաղորդ են. իրենք հենց դա պլանավորված անում են: Հստակեցնենք, որ այդ բոլոր գործընթացները մեր երկրի իրավական որևէ մարմնի կողմից չէ, որ ղեկավարվում է. դա արվում է դրսի, այն է՝ Ադրբեջանի իշխանությունների կողմից:
Եթե չկա գրավոր կամ մեզ հայտնի պայմանավորվածություն, ապա նման բաները չեն արվում առանց որևէ պայմանավորվածության: Այսինքն՝ մեզ համար պետք է պարզ լինի, որ այդ պայմանավորվածությունը տեղի է ունեցել հենց քաղաքացի Փաշինյան Նիկոլի և Ադրբեջանի բարձրագույն իշխանության միջև:
Երբ պետությունը չի արձագանքում, նշանակում է՝ արդեն կա համաձայնություն այն պետության ներկայացուցիչների հետ, որոնք անում են այդ գործողությունները:
Լարիսա Ալավերդյանը շեշտեց՝ տեղի ունեցողը ոչ միայն Հայաստանի պարագայում է անօրինական, այլև Ադրբեջանի համար. «Ադրբեջանը ևս հստակ գիտի, որ նման գործողություններն իրականացվում են բոլորովին այլ ձևով. ստեղծվում է հանձնաժողով, եթե պետություններն ունեն խնդիր, ապա հրավիրվում է երրորդ կողմը, և այլն»:
