ՀՀ պետական պարտքը 1 տարում աճել է 647 մլն 230 հազար դոլարով
ՀՀ պետական պարտքը (ներքին և արտաքին) 2020-ի դեկտեմբերի 31-ի դրությամբ, ըստ նախնական տվյալների, կազմել է 7 մլրդ 968 մլն 486 հազար ԱՄՆ դոլար՝ 2019-ի 7 մլրդ 321 մլն 256 հազար դոլարի փոխարեն և աճել 647 մլն 230 հազար դոլարով կամ 8.84%-ով։
Ըստ ՀՀ վիճակագրական կոմիտեի, արտաքին պարտքն անցյալ տարվա դեկտեմբերի վերջի դրությամբ կազմել է 6 մլրդ 53 մլն 147 հազ. դոլար և մեկ տարում աճել 268 մլն 629 հազար դոլարով կամ ավելի քան 4.64%-ով, այդ թվում՝ ՀՀ կառավարության պարտքը կազմել է 5 մլրդ 593 մլն 202 հազար դոլար և 12 ամսում աճել ավելի քան 298 մլն դոլարով կամ մոտ 5.63%-ով, իսկ ՀՀ կենտրոնական բանկի պարտքը կազմել է 459 մլն 944 հազար դոլար և 2019-ի դեկտեմբերի 31-ի համեմատ նվազել 29 մլն 373 հազար դոլարով կամ մոտ 6%-ով (կրկնահաշվարկից խուսափելու նպատակով` ՀՀ կենտրոնական բանկի արտաքին վարկերի գծով ՀՀ կառավարության կողմից տրամադրված արտաքին երաշխիքները արտացոլված են ՀՀ կենտրոնական բանկի արտաքին պարտքի մեջ)։
ՀՀ ներքին պարտքը 2020-ի դեկտեմբերի 31-ի դրությամբ կազմել է 1 մլրդ 915 մլն 340 հազար դոլար և մեկ տարում աճել 378 մլն 601 հազար դոլարով կամ ավելի քան 24.6%-ով, որից ռեզիդենտների կողմից ձեռք բերված պետական գանձապետական պարտատոմսերի գծով 1 մլրդ 834 մլն 773 հազար դոլար պարտավորությունները այդ ժամանակահատվածում աճել են ավելի քան 422 մլն դոլարով կամ մոտ 29.9%-ով, իսկ ռեզիդենտների կողմից ձեռք բերված արտարժութային պետական պարտատոմսերի գծով պարտքն անցյալ տարվա դեկտեմբերի 31-ին կազմել է 80 մլն 567 հազար դոլար և 2019-ի նույն օրվա համեմատ նվազել 43 մլն 402 հազար ԱՄՆ դոլարով կամ ավելի քան 35%-ով։ Այլ ներքին պարտավորություններ Հայաստանի Հանրապետությունը չի ունեցել։
