Իրանը ՄԱԳԱՏԷ-ին հայտնել է Ֆորդոյի ատոմային օբյեկտում շինարարության մասին
Իրանն Ատոմային էներգիայի միջազգային գործակալությանը (ՄԱԳԱՏԷ) իրազեկել է Ֆորդոյի ատոմային օբյեկտում շինարարության մասին: Դեկտեմբերի 21-ին այդ մասին հայտարարել է Իրանի արտաքին գործերի նախարարության պաշտոնական ներկայացուցիչ Սայիդ Խաթիբզադեն:
«Մենք ՄԱԳԱՏԷ-ին հայտնեցինք այդ (շինարարության) մասին եւ ոչինչ չենք թաքցրել»,- ասել է նա:
Դիվանգետը հավելել է, որ «(ատոմի ոլորտում) Իրանի բոլոր գործողությունները գտնվում են ՄԱԳԱՏԷ-ի հսկողության ներքո»: «Մեք գործակալությանը խորհուրդ ենք տալիս ձեռնպահ մնալ քաղաքական հարցերից, ինչը կօգնի պահպանելու թե՛ ՄԱԳԱՏԷ-ի հեղինակությունը եւ թե՛ Իրանի հետ կազմակերպության համագործակցությունը»,- նշել է նա:
Դեկտեմբերի 18-ին AP (Associated Press) գործակալությունը հայտնել էր, որ արբանյակային լուսանկարները վկայում են Իրանի Ֆորդոյի ատոմային օբյեկտում ստորգետնյա շինարարություն սկսելու մասին:
Նշվում է, որ աշխատանքներն սկսվել են սեպտեմբերի սկզբին: Դեկտեմբերի 1-ին Իրանի Մեջլիսը քվեարկել է այն օրինագծի օգտին, որը կառավարությանը պարտավորեցնում է ավելացնելու ուրանի հարստացման աստիճանը: Օրինագծի համաձայն՝ երկրի իշխանությունները պետք է մեկ տարվա ընթացքում հազարական լրացուցիչ ցենտրիֆուգներ շահագործման դնեն Նաթանզի եւ Ֆորդոյի միջուկային օբյեկտներում, հաղորդել է ՏԱՍՍ-ը:
