«Մուլտի գրուպ»-ի տնօրեն Սեդրակ Առուստամյանը կալանավորվեց

Երևան քաղաքի առաջին ատյանի ընդհանուր իրավասության դատարանը բավարարեց ԱԱԾ քննչական մարմնի միջնորդությունը և «Մուլտի գրուպ» ընկերության տնօրեն Սեդրակ Առուստամյանի նկատմամբ խափանման միջոց ընտրեց երկամսյա ժամկետով կալանավորումը: Դատարանը նաև բավարարել է Ս. Առուստամյանի պաշտպանի միջնորդությունը և ոչ իրավաչափ է ճանաչել ապրիլի 23-ին ԱԱԾ աշխատակիցների կողմից Առուստամյանի ձերբակալությունը: Տեղեկությունը 168.am–ին փոխանցեց Սեդրակ Առուստամյանի փաստաբան Հովիկ Սուքիասյանը:

Հիշեցնենք, որ դատարանը  Առուստամյանին ձերբակալելու դեմ որոշման փաստաբանի միջնորդության քննությունը սկսել էր երեկ: Այսօր դատարանը նաև քննել էր քննչական մարմնի՝ Առուստամյանին կալանավորելու միջնորդությունը:  «Մուլտի գրուպ» ընկերության տնօրենն արդեն հարցաքննվել է և չի ընդունել իրեն առաջադրված մեղադրանքը:

Տեղեկացնենք, որ Սեդրակ Առուստամյանի ձերբակալության մասին տեղեկությանը զուգահեռ՝ լուրեր շրջանառվեցին, թե այն գործը, որի շրջանակներում ձերբակալվել է Առուստամյանը, առնչվում է ՊԵԿ նախկին նախագահ, ֆինանսների նախկին նախարար Գագիկ Խաչատրյանին:

Առուստամյանի փաստաբանը քրեական գործի մանրամասների մասին խոստացավ ներկայացնել ավելի ուշ:

Հիշեցնենք, որ ավելի վաղ «Մուլտի գրուպ» ընկերության տնօրեն Սեդրակ Առուստամյանին մեղադրանք էր առաջադրվել ևս երկու քրեական գործով:

ՀՀ քննչական կոմիտեն ապրիլի 8-ին տեղեկացրել էր, որ մեղադրանք է առաջադրվել «Մուլտի գրուպ կոնցեռն» ՍՊԸ գլխավոր տնօրենին՝ Աբովյան փողոցում հյուրանոցային համալիր կառուցելու ընթացքում օրենսդրության պահանջները չպահպանելու դեպքով։ Նրան մեղադրանք էր առաջադրվել ՀՀ քրեական օրենսգրքի 315.1-րդ հոդվածով (պետական կամ համայնքային սեփականություն հանդիսացող հողամասերի ինքնակամ զավթումը չդադարեցնելը և դրա հետևանքները չվերացնելը, ինչպես նաև ինքնակամ շենքերի, շինությունների կառուցումը չդադարեցնելը և անօրինական կառույցները չքանդելը)։ Նրա նկատմամբ խափանման միջոց է կիրառվել ստորագրություն` չհեռանալու մասին։

ՀՔԾ-ում քննվող «Հյուսիս-Հարավ» ճանապարհի շինարարությանն առնչվող քրեական գործի շրջանակում 2019-ի սեպտեմբերի 19–ին մեղադրանք էր առաջադրվել Սեդրակ Առուստամյանին և նրան կալանավորելու որոշում էր կայացվել։ Սակայն սեպտեմբերի 22-ին Առուստամյանը 20 մլն դրամ գրավի դիմաց ազատ էր արձակվել: «Մուլտի Գրուպ»-ի տնօրենին մեղադրանք էր առաջադրվել առանձնապես խոշոր չափով փողերի լվացման,  ֆինանսական բուրգ ստեղծելու կամ ղեկավարելու, ինչպես նաև հարկային պարտավորություններից խուսափելու համար։ Քրեական գործի քննությունը շարունակվում է։