Մասնավոր հատվածում աշխատանքը կորցրած քաղաքացիներին կտրվի նվազագույն աշխատավարձի չափով միանվագ դրամական օգնություն
Հայաստանի Հանրապետության այն քաղաքացիները, որոնք 2020 թվականի հունվարի 1-ից մինչև մարտի 13-ն աշխատանքային պայմանագրով աշխատանքային հարաբերությունների մեջ են գտնվել մասնավոր հատվածի գործատուների հետ, սակայն ազատվել են աշխատանքից մարտի 13-ից մինչև մարտի 30-ն ընկած ժամանակահատվածում, կստանան միանվագ դրամական աջակցություն՝ նվազագույն աշխատավարձի չափով:
Այս որոշման նախագիծն ընդունեց Կառավարությունն այսօր՝ մարտի 30-ի արտահերթ նիստում:
Առաջարկվող աջակցությունից, սակայն, չեն կարող օգտվել այն անձինք, որոնց՝ աշխատանքից ազատվելուց առաջ վերջին երկու ամսվա աշխատավարձը գերազանցել է 500 հազար դրամը, կամ նշված ժամանակահատվածում աշխատանքային հարաբերությունների մեջ են գտնվել այլ գործատուի հետ, կամ հանդիսացել են նաև անհատ ձեռնարկատեր:
Միանվագ այս աջակցությունից չեն օգտվի նաև այն քաղաքացիները, որոնք ունեն մինչև 14 տարեկան երեխա և աշխատանքից ազատվել են արտակարգ դրության իրավական ռեժիմի հաստատումից հետո, որովհետև նրանց համար կառավարությունն արդեն ընդունել է 100 հազար դրամ միանվագ օգնություն տրամադրելու մասին որոշումը:
Նախագիծը չի տարածվում հանրային ծառայողների վրա:
Անձի աշխատանքից ազատված լինելու փաստի և ստացած եկամուտների մասին տեղեկատվությունն Աշխատանքի և սոցիալական հարցերի նախարարությանը կտրամադրի Պետական եկամուտների կոմիտեն:
Նշենք, որ այս որոշումը դարձավ կորոնավիրուսի տնտեսական հետևանքները հաղթահարելուն միտված՝ կառավարության 6-րդը քայլը: Հիշեցնենք, որ ևս 5-ը գործադիրն ընդունել էր մարտի 26-ի նիստում:
