«ՌԴ քաղաքացին 25.000 դրամ է տվել տաքսու վարորդին ու խնդրել, որ իրենց Ծաղկաձորից արագ հանի ու հասցնի Երևան». Գևորգ Պետրոսյան
ԱԺ «Բարգավաճ Հայաստան» խմբակցության պատգամավոր Գևորգ Պետրոսյանի խոսքով՝ այն, որ կորոնավիրուսի համար կարանտինը Ծաղկաձորում անցկացնելու որոշման հետևանքով այնտեղ բոլոր հյուրանոցները դատարկ են, խմբակցության ղեկավար Գագիկ Ծառուկյանը դրա մասին արդեն խոսել է:
«Ովքեր շահագրգռված են, կարող են գնալ ու տեսնել, Ծառուկյանն առաջարկեց, որ ինքը մեքենան կտրամադրի: Այնտեղի մարդկանցից արդեն դժգոհություններ ենք ստացել, նամակներ են գրում, որ տուրիստները լքել են ու չեղարկել են ամրագրումները: Ծառուկյանն ի՞նչ շահ ունի ասելու մի բան, որն իրականությանը չհամապատասխանի: Ես էլ եմ առաջարկում, կարող եք մեկ-երկու լրագրողով գնալ ու տեսնել, թե ինչ իրավիճակ է: Սովորական օրերին Ծաղկաձորից Երևան տաքսիները 6-7 հազար դրամ են վերցնում, ՌԴ քաղաքացի նստել է տաքսի ու 25 հազար դրամ է տվել տաքսու վարորդին ու խնդրել, որ իրենց Ծաղկաձորից արագ հանի ու հասցնի Երևան»,- այսօր ԱԺ-ում լրագրողների հետ զրույցում ասաց Գևորգ Պետրոսյանը:
Նա նշեց, որ «Իմ քայլի» պատգամավորները, նաև Առողջապահության նախարարը եղել են Ծաղկաձորում, ուստի ինքը չէ, որ պետք է նրանց ասի, թե ինչ իրավիճակ է այնտեղ:
Գևորգ Պետրոսյանի խոսքով՝ կորոնավիրուսի կասկածանքով անձանց կարող էին տեղափոխել մեկ այլ վայր, այլ ոչ թե՝ Ծաղկաձոր:
Մանրամասները՝ 168.am-ի տեսանյութում
