Բանակում 8 ինքնասպանության դեպքը կանխվել է ճիշտ և կազմակերպված աշխատանքի արդյունքում. Գաբրիել Բալայան
Փետրվարի 18-ին ԱԺ-ում աշխատանքային փակ քննարկումից հետո Զինված ուժերի Գլխավոր շտաբի պետ Արտակ Դավթյանը լրագրողների հետ զրույցում անդրադառնալով բանակում տեղի ունեցած վերջին դեպքերին՝ նշեց, որ 2019 թվականի հունիսից մինչև օրս բանակում 8 ինքնասպանության դեպք է կանխվել։
Պաշտպանության փոխնախարար Գաբրիել Բալայանի խոսքով՝ այդ 8 զինվորի կյանքը հաջողվել է փրկել ճիշտ և կազմակերպված աշխատանքի արդյունքում։
«Երբ զեկուցվել է, որ այս կամ այն զինվորի մոտ ինչ-որ խնդիր են տեսնում, տարվել է համապատասխան աշխատանք, և ինքնասպանության դեպքերը կանխվել են, այսինքն՝ այդ զինվորին մարտական հերթափոխության մեջ չեն ներգրավել, հոգեբանական զրույց են տարել նրա հետ, այդ թվում՝ մեր հոգևորական ծառայությունն է շատ օգնում, շատ դեպքերում գնդերեցներն էլ են օժանդակում և համապատասխան հոգեբանի դեր տանում»,- ԱԺ-ում լրագրողների հետ զրույցում նշեց Գ. Բալայանը։
Անդրադառնալով «Իմ քայլը» խմբակցության պատգամավոր Հայկ Սարգսյանի ներկայացրած նախագծին, ըստ որի՝ քաղաքացին կարող է պետական բյուջե վճարել 10 մլն դրամ և բանակում չծառայել, Գաբրիել Բալայանը նշեց, որ, ինչպես նախկինում, այնպես էլ այժմ պնդում է՝ նման նախագիծը Հայաստանի համար չէ և կիրառելի չէ։
«Պատգամավորի հետ խոսել ենք, գործընկերային հարաբերություններ են, և որևէ խնդիր չեմ տեսնում, աշխատանքային կարգով քննարկել ենք»,- շեշտեց նա։
Ինչ վերաբերում է սահմանային իրավիճակին, Գաբրիել Բալայանը նշեց, որ այժմ համեմատաբար հանգիստ է, իսկ կրակոցներ միշտ լինում են, որոնք ստանում են համարժեք պատասխան։
