Գիտնականները կարտոֆիլն առողջարար են ճանաչել
Կազմվածքի համար վնասակար համարվող կարտոֆիլը նպաստում է մարդու առողջության բարելավմանը: Նման եզրահանգման են եկել Փենսիլվանիա նահանգի համալսարանի ամերիկացի գիտնականները, հայտնում է Medical News Bulletin-ը:
Մասնագետները փորձարկում են կատարել, որի ընթացքում կամավորներին երկու խմբի են բաժանել. առաջին խումբը չորս շաբաթվա ընթացքում պետք է սնվեր մաքրված հատիկներից պատրաստված ուտեստներով, ներառյալ՝ բրինձ, իսկ երկրորդ խումբը՝ շոգեխաշած կամ ջեռոցում պատրաստված կարտոֆիլային ուտեստներով:
Ուսումնասիրությունն ավարտելուց հետո գիտնականները չափել են մասնակիցների մոտ կարդիոմետաբոլիկ ռիսկի ցուցիչները, այդ թվում՝ պլազմային գլյուկոզան, խոլեստերինը, շիճուկային ինսուլինը և զարկերակային արյան ճնշումը:
Պարզվել է, որ նրանք, ովքեր կարտոֆիլ են կերել, ավելի լավ ցուցանիշներ ունեն, քան այն խումբը, որը հացահատիկից պատրաստված կերակուր է կերել:
Պատրաստեց Անի Գաբուզյանը
