Լռության գինը
168.am-ի տեղեկություններով՝ երեկ ՀՀ Արտաքին գործերի նախարար Զոհրաբ Մնացականյանը հանդիպել է Եվրամիության դեսպանների հետ: Հանդիպման նպատակը սահմանադրական փոփոխությունները ԵՄ դեսպանների հավանությանն արժանացնելն է եղել: Մնացականյանը փորձել է տարբեր հիմնավորումներով համոզել, որ ամեն ինչ ըստ օրենքի է արվում:
Հանդիպման ժամանակ իշխանությունների համար տհաճ հարցեր են հնչել: Հատկապես կարևորվել է այն հարցը, թե ինչո՞ւ ողջ այս գործընթացը չի իրականացվում Վենետիկի հանձնաժողովի փորձագիտական եզրակացության առկայությամբ, և ինչո՞ւ է առաջին անգամ ՀՀ-ում սահմանադրական փոփոխություններ տեղի ունենում՝ առանց Վենետիկի հանձնաժողովի խորհրդատվության:
Իհարկե, Մնացականյանի պատճառաբանություններն ու հիմնավորումները ԵՄ ներկա դեսպաններին չեն համոզել, նրանցից յուրաքանչյուրը հետևում է ողջ գործընթացին, սակայն այս ամենի մեջ այլ վտանգ կա: Եթե անգամ միջազգային կառույցներն այժմ շատ կտրուկ չարձագանքեն այս ամենաթողությանը, որն այժմ կատարվում է Սահմանադրության շուրջ Հայաստանում, ապա գերտերությունները փորձելու են Նիկոլ Փաշինյանի այս հակասահմանադրական քայլերը կապիտալիզացնել Հայաստանի առջև միջազգային օրակարգում, հատկապես Արցախյան բանակցությունների շուրջ դնելով ավելի մեծ կոմպրոմիսների հարցը:
Սա նշանակում է, որ ըստ էության հիմա՝ այս փուլում, իշխանությունների հանդեպ նրանք շատ կոշտ միջոցառումներ, հայտարարություններ չեն իրականացնի՝ մտքում պահելով այս ամենը, սակայն Ղարաբաղի բանակցությունների ժամանակ կհիշեցնեն, որ նման ոչ լեգիտիմ գործողություններ են իրականացվել:
Սա, ըստ էության, այն գործիքն է, որը երկար տարիներ աշխատել է Ադրբեջանի դեմ, և Ադրբեջանից մշտապես կորզվել են, այսպես ասած, համաձայնություններ, կոնսենսուսներ և այլն: Եվ ահա, վտանգ կա, որ այս կռվանը կօգտագործվի նաև Հայաստանի դեմ՝ երկրի համար չափազանց կարևոր որևէ խնդրի դեպքում:
Ի դեպ, երեկ տարածած իր հայտարարության մեջ Հայաստանի հանրապետական կուսակցությունը (ՀՀԿ) նույնպես զգուշացնում էր այս մասին. «Նման գործողությունները հարված են հասցնում երկրի միջազգային հեղինակությանը և թուլացնում Հայաստանի դիրքերը ռազմավարական և անվտանգային նշանակություն ունեցող գործընթացներում, այդ թվում՝ Արցախյան հիմնախնդրի շուրջ»:
