Դատախազությունը բողոքարկել է Կարեն Խաչատրյանին գրավի դիմաց ազատ արձակելու մասին որոշումը
ՀՀ դատախազությունը բողոքարկել է Պետական եկամուտների կոմիտեի (ՊԵԿ) նախկին նախագահ, ֆինանսների նախկին նախարար Գագիկ Խաչատրյանի եղբորորդի Կարեն Խաչատրյանին գրավի դիմաց ազատ արձակելու մասին որոշումը։
«Արմենպրես»-ի հետ զրույցում այս մասին ասաց ՀՀ գլխավոր դատախազության հանրային կապերի բաժնի պետ Արևիկ Խաչատրյանը:
Հունվարի 22-ին Երևանի ընդհանուր իրավասության դատարանը բավարարել էր Կարեն Խաչատրյանի կալանավորման ժամկետը երկարացնելու մասին ԱԱԾ քննիչի միջնորդությունը և միաժամանակ բավարարել նաև պաշտպանական կողմի միջնորդությունը թույլատրելի համարելու գրավի կիրառումը։ Գրավի չափ էր սահմանվել 20 մլն ՀՀ դրամը, որը վճարելուց հետո Խաչատրյանն ազատ է արձակվել:
Գագիկ և Կարեն Խաչատրյանները որպես մեղադրյալներ ներգրավվել են ավելի քան 210 մլն դրամ վատնելու և պաշտոնեական դիրքի չարաշահման առթիվ հարուցված քրեական գործի շրջանակում։
