ԱՄՀ-ն հանել է տարիքային սահմանափակումները կարգադրիչ-տնօրենի պաշտոնի համար
Արժույթի միջազգային հիմնադրամի (ԱՄՀ) կառավարիչների խորհուրդը ձայների պարզ մեծամասնությամբ որոշում է ընդունել հանել բոլոր տարիքային սահմանափակումները կարգադրիչ-տնօրենի պաշտոնի համար: Այդ մասին ասված է հիմնադրամի մամուլի տեղեկագրում:
Օգոստոսի վերջին այդ հանձնարարականով հանդես էր եկել ԱՄՀ-ի գործադիր խորհուրդը: Կազմակերպության կանոնադրության համաձայն, ԱՄՀ-ի ղեկավարը չի կարող ընտրվել 65 եւ ավելի բարձր տարիքի մարդ, իսկ արդեն ընտրված տնօրենը չի կարող շարունակել պարտականությունների կատարումը 70 տարեկանից հետո: Այս կանոնը գործում է 1951 թվականից:
Հանելով տարիքային սահմանափակումները՝ ԱՄՀ-ն կարգադրիչ-տնօրենի պաշտոնն ստանձնելու ճանապարհ է բացում Եվրամիության թեկնածու Կրիստալինա Գեորգիեւայի համար, որը 66 տարեկան է: ԱՄՀ-ի ղեկավարի տեղը թափուր էր մնացել այն բանից հետո, երբ Քրիստին Լագարդը հիմնադրամի կարգադրիչ-տնօրենի լիազորությունները վայր դրեց Եվրոպայի կենտրոնական բանկի նախագահի պաշտոնում առաջադրվելու կապակցությամբ:
Անցումային ժամանակաշրջանում տնօրենի պարտականությունները կատարում է Լագարդի առաջին տեղակալը՝ ամերիկացի Դեւիդ Լիփթոնը, հաղորդել է «Ինտերֆաքս»-ը:
