«Ոչ միշտ է, որ մենք հաղորդագրություններ ենք տարածում». Վլադիմիր Կարապետյանը՝ «Սասնա ծռերի» ներկայացուցիչների հետ Նիկոլ Փաշինյանի հանդիպման մասին
«Սասնա Ծռեր» համահայկական կուսակցության ներկայացուցիչներ Ժիրայր Սէֆիլյանը և Գարեգին Չուգասզյանը երեկ իրենց նախաձեռնությամբ հանդիպել են ՀՀ վարչապետ Նիկոլ Փաշինյանի հետ։ Հանդիպումից հետո «Սասնա Ծռեր» համահայկական կուսակցության քարտուղարությունը շտապեց հաղորդագրություն տարածել՝ նշելով, որ հանդիպման ընթացքում քննարկվել է առկա քաղաքական իրավիճակը։
Ուշագրավ է, որ քննարկված հանդիպման մասին կառավարության պաշտոնական էջում որևէ լուր հրապարակված չէ։ Հանդիպման մասին լռում է նաև վարչապետի ֆեյսբուքյան պաշտոնական էջը:
168.am–ը վարչապետի մամուլի քարտուղար Վլադիմիր Կարապետյանից ճշտեց՝ արդյո՞ք լինելու է հանդիպման մասին հաղորդագրություն, ինչին ի պատասխան նա ասաց.
«Վարչապետը սովորաբար օրվա ընթացքում բազմաթիվ հանդիպումներ է ունենում. ոչ միշտ է, որ մենք հաղորդագրություններ ենք տարածում»:
Մեր դիտարկմանը, իսկ հնարավո՞ր է գրառում լինի Նիկոլ Փաշինյանի ֆեյսբուքյան էջում՝ հաշվի առնելով, որ պարբերաբար գրառումներ լինում են, Վլադիմիր Կարապետյանը արձագանքեց.
«Ֆեյսբուքյան էջն ավելի անձնական է. ես պաշտոնական մասով եմ ձեզ ասում»:
Զարուհի Դիլանյան
