Մանվել Գրիգորյանի գործով ՄԻԵԴ-ն անհապաղ միջոցառումներ կիրառելու որոշում է կայացրել
Մանվել Գրիգորյանի գործով Մարդու իրավունքների եվրոպական դատարանն արդեն որոշում է կայացրել անհապաղ միջոցառումներ կիրառել՝ Մ. Գրիգորյանի համապատասխան բուժում ստանալու հետ կապված։ Այս մասին 168.am-ի հետ զրույցում ասաց Մանվել Գրիգորյանի շահերի պաշտպան Լևոն Բաղդասարյանը։
Փաստաբանի խոսքով՝ ՄԻԵԴ-ը Մանվել Գրիգորյանի գործով արդեն երրորդ որոշումն է կայացրել՝ այն լսելու է առաջնահերթության կարգով։
Նա հույս հայտնեց, որ սարերի հետևում չէ այն օրը, երբ ՄԻԵԴ-ը կլսի Մ. Գրիգորյանի պաշտպանների գանգատը, մասնավորապես՝ նրա խոշտանգման և անօրինական կալանքի տակ պահելու հետ կապված, քանի որ իրենք ՄԻԵԴ-ին դիմել են հենց այդ պահանջով։
Անդրադառնալով Գրիգորյանի առողջական վիճակին, նա հիշեցրեց, որ դատարանի ձևավորած միջգերատեսչական հանձնաժողովի ստեղծումից հետո իր պաշտպանյալը կրկին հետազոտվել է։
«Գրիգորյանի վիճակը ծանր է, դա ֆիքսվում է բժիշկների կողմից, առողջական վիճակում բացասական դինամիկա է արձանագրել նաև դրսից եկած նրան վիրահատած բժիշկը։ Նա ահազանգել է, որ Գրիգորյանի առողջական վիճակը կրիտիկական է։ Միջգերատեսչական հանձնաժողովի որոշման հիման վրա նրան տեղափոխեցին և հետազոտություն անցկացրեցին այլ բժշկական կենտրոնում, որտեղ զրկված է եղել ոչ միայն տարրական պայմաններից, այլև այդ երեք օրերին բուժում չստացավ»,- շեշտեց Լ. Բաղդասարյանը։
Անդրադառնալով Գրիգորյանի խափանման միջոց կալանավորումը գրավով փոխարինելու միջնորդություն ներկայացնելուն, նա տեղեկացրեց, որ այս պահին դատարանը գտնվում է արձակուրդում, վերադառնալուց հետո, ելնելով իրավիճակից, միջնորդության հետ կապված իրենց գործառույթները կիրականացնեն։
Զվարթ Խաչատրյան
