«99.9 տոկոս հավանականությամբ՝ թռիչքները լինելու են». «Պոբեդա»-ի հայաստանյան գործընկեր
«Ինչքան ես տեղյակ եմ, խնդիրն արդեն լուծված է»,- այսպես արձագանքեց ՀՀ Քաղաքացիական ավիացիայի կոմիտեի նախագահ Տաթևիկ Ռևազյանը՝ 168.am-ի հարցին, թե ինչ դիրքորոշում ունի կոմիտեն «Պոբեդա» ավիաընկերության թռիչքների հնարավոր դադարեցման մասին:
Հիշեցնենք, որ ավելի վաղ հայտնել էինք, որ «ТАСС»-ի փոխանցմամբ՝ «Պոբեդա» լոուքոսթերը ձմեռային սեզոնից կդադարեցնի Գյումրի (Հայաստան) չվերթերը: Այս մասին «ТАСС»-ին հայտնել է ավիաընկերությունում աղբյուրը: Նրա խոսքով՝ չվերթերի դադարեցման վերաբերյալ որոշման պատճառը կապված է Գյումրիի օդանավակայանում վառելանյութի պարբերական թերլիցքավորման հետ:
Տ. Ռևազյանը մեզ հետ զրույցում խնդրեց կապ հաստատել «Պոբեդա» ավիաընկերության հայաստանյան գործընկերների հետ՝ լրացուցիչ մեկնաբանությունների համար:
Ավիաընկերության ինֆորմացիոն գործընկեր «Քրոսսնեթի» ղեկավար Վարդան Ալեքսանյանը մեզ հետ զրույցում տեղեկացրեց, որ ավիաընկերությունը կշարունակի նաև ձմեռային թռիչքները.
««Պոբեդան» ինչպես կատարել է չվերթեր Հայաստանի Գյումրի օդանավակայան, նույն կերպ շարունակելու է: Այս պահի դրությամբ, ինչքան ճշտել եմ բոլորի հետ, պետք է շարունակվեն:
99.9 տոկոս հավանականությամբ թռիչքները լինելու են, նույնիսկ հնարավոր է՝ շաբաթվա մեջ օրեր լինեն, երկու անգամ»:
Վ. Ալեքսանյանը հավելեց, որ հարաբերությունները թե՛ ավիացիոն վարչության, թե՛ օդանավակայանի հետ շարունակում են մնալ նորմալ, գործնական:
Զարուհի Դիլանյան
