Թուրքիայում 1 տոննա մարիխուանա է առգրավվել
Թուրքիայի Բաթման քաղաքում մի բեռնատարում կատարված խուզարկության արդյունքում մեծ քանակությամբ թմրանյութ է հայտնաբերվել: Այս մասին տեղեկացնում ermenihaber.am-ը:
Բաթմանի նահանգային անվտանգության վարչության թմրանյութերի շրջանառության դեմ պայքարի բաժնի աշխատակիցները Բաթմանի մուտքի մոտ կանգնեցրել են վարորդ Ա.Յ.-ի մեքենան:
Ոստիկանական հատուկ վարժեցված շների մասնակցությամբ կատարված խուզարկությամբ մեքենայում հայտնաբերվել է պլաստիկե խողովակների մեջ թաքցված 1 տոննա մարիխուանա տեսակի թմրանյութ:
Վարորդը ձերբակալվել է, թմրանյութն՝ առգրավվել: Ըստ աղբյուրի՝ թմրանյութերի ապօրինի շրջանառության այս դեպքը կարող է առնչություն ունենալ Թուրքիայում ահաբեկչական խմբավորում համարվող «Քուրդիստանի բանվորական» կուսակցության (ՔԲԿ-PKK) հետ:
