ՀՅԴ-ն ու «Ժառանգություն»-ը քննարկել են համատեղ գործունեության հնարավոր ուղղությունները
«Ժառանգություն» կուսակցության գրասենյակում հուլիսի 3-ին տեղի է ունեցել Հայ Յեղափոխական Դաշնակցության նախաձեռնած քաղաքական հանդիպումը: Ինչպես տեղեկանում ենք ՀՅԴ պաշտոնական կայքից, դաշնակցությունից մասնակցել են ՀՅԴ ԳՄ անդամներ Արծվիկ Մինասյանը, Լիլիթ Գալստյանը եւ Արմենուհի Կյուրեղյանը, «Ժառանգություն»-ից՝ կուսակցության նախագահ Անդրանիկ Գրիգորյանը, փոխնախագահ Նարինե Դիլբարյանը, Գործադիր մարմնի անդամներ Հայկ Գասպարյանը, Գագիկ Մարգարյանը:
Հանդիպման ընթացքում քննարկվել են համատեղ գործունեության հնարավոր ուղղությունները, որպես համագործակցության եզրեր` ընտրվել են դատաիրավական բարեփոխումները, Ընտրական օրենսգրքի եւ «Կուսակցությունների մասին» օրենքի փոփոխությունները:
Նշվել է, որ Արցախի եւ Հայաստանի հետագա առավել սերտ գործակցության հարցում երկու կուսակցությունների դիրքորոշումները ընդհանուր են։
