«Նրանք անխտիր սպանում են շատ, շատ խաղաղ բնակիչների. Կանգ առե՛ք». Թրամփ
ԱՄՆ-ի նախագահ Դոնալդ Թրամփը հունիսի 2-ին կոչ է արել Ռուսաստանին, Սիրիայի իշխանություններին եւ Իրանին՝ դադարեցնելու ռմբակոծումները Սիրիայի Իդլիբի նահանգի տարածքում: Համապատասխան հաղորդագրությունը Սպիտակ տան ղեկավարը զետեղել է Twitter-ում։
«Լսեցի, որ Ռուսաստանը, Սիրիան եւ ավելի պակաս չափով Իրանն ամբողջ ուժով ռմբակոծում են Սիրիայի Իդլիբի նահանգը եւ զանգվածային կարգով սպանում խաղաղ շատ բնակիչների: Աշխարհը հետեւում է այդ սպանդին: Ո՞րն է նպատակը, դա ի՞նչ կտա ձեզ: Կանգ առե՛ք»,- գրել է քաղաքական գործիչը:
Մեծ Բրիտանիա մեկնելուց առաջ Սպիտակ տան Հարավային բացատում լրագրողների հետ կայացած զրույցում Թրամփը նշել է.
«Ինձ դուր չի գալիս այն, ինչ տեղի է ունենում Սիրիայի Իդլիբում: Նրանք անխտիր սպանում են շատ, շատ խաղաղ բնակիչների»:
Իդլիբի շրջանում իրադրությունը սրվել է մայիսի սկզբին, մայիսի 21-ից զինյալները զանգվածային գրոհներ են ձեռնարկում կառավարական զորքերի դիրքերի վրա, հաղորդել է ՏԱՍՍ-ը:
