«Ի՞նչ եք ասում, աչիկ ջան, լո՞ւրջ աջակցել ա։ Կարո՞ղ ա՝ ձեր բարեկամներին ա աջակցել։ Ինձ ոչ մեկը չի աջակցել». Գագիկ Ծառուկյանը՝ ԲՀԿ-ին Ռոբերտ Քոչարյանի աջակցության մասին

«Օրակարգում այդպիսի հարց չկա, մենք չենք քննարկել և քննարկման ենթակա չի»,- այսօր ԱԺ-ում լրագրողների հետ զրույցում հայտարարեց «Բարգավաճ Հայաստան» խմբակցության ղեկավար Գագիկ Ծառուկյանը՝ ի պատասխան հարցի, թե հնարավո՞ր է՝ ԲՀԿ-ն համագործակցի Ռոբերտ Քոչարյանի հետ։

Քոչարյանի խափանման միջոցի փոփոխման վերաբերյալ Գ.Ծառուկյանը նշեց, որ դա եղել է ըստ օրենքի, օրենքի սահմաններում է կատարվել և անօրինական բան չի եղել։

Նա հերքեց, որ հանդիպել է Քոչարյանի հետ. «Ո՛չ զանգահարել եմ, ո՛չ հանդիպել եմ։ Կարող եք անվտանգությանը դիմել, ձեզ կտեղեկացնեն»։

Հարցին՝ ինչո՞ւ է խուսափում Քոչարյանի հետ հանդիպելուց, Ծառուկյանը տարակուսեց, որ չի խուսափում, պարզապես կապ չկա, ինչի՞ մասին է խոսքը։

Դիտարկմանը, որ ժամանակին ԲՀԿ-ն կապում էին Քոչարյանի հետ, Ծառուկյանը հակադարձեց.

«Հիմա ում հետ պետք ա, կապում են, որ դրա անհրաժեշտությունը կա։ Մենք ի՞նչ կապ ունենք, որ պետք է կապեն։ Ամեն մարդ էսօր իրավունք ունի քաղաքական գործունեությամբ զբաղվելու։ Էսօր օրը 2 հատ կուսակցություն ա բացվում՝ ամեն մեկն իր քաղաքական տեսակետով, իր մոտեցմամբ, քաղաքական գործունեությամբ։ Դա մեզ հետ ի՞նչ կապ ունի»։

Լրագրողի դիտարկմանը, որ ժամանակին Քոչարյանն աջակցել է Ծառուկյանի բիզնեսների ծաղկմանը, ԲՀԿ առաջնորդն ասաց.

«Ի՞նչ եք ասում, աչիկ ջան, լո՞ւրջ աջակցել ա։ Կարո՞ղ ա՝ ձեր բարեկամներին ա աջակցել։ Ինձ ոչ մեկը չի աջակցել, որևիցե մեկի առաջ ոչ պարտավորություն ունեմ, որևիցե բան չունեմ։ Հերիք ա»։

Ծառուկյանը լրագրողներին մեղադրեց «անկապ» հարցեր տալու մեջ, ինչը երկրին «տանում է վտանգի.

«Որոշ կուսակցությունների անհիմն հայատարարություններից, որ մարդիկ նայելով իրավիճակը, մենք էսօր պետք է տնտեսական հեղափոխություն անենք, որ ժողովուրդը էսօր դրան արդեն մի տարի սպասում ա, որ պետք է մի բան փոխվի։ Բայց այսպիսի անկապ, անհիմն հայտարարություններ, որ ներդրողները լիարժեք ուզում են գումար դնեն, իսկ ցանկացած ներդրող գումարը դնում ա այն երկրում, որտեղ կայունություն կա, վստահություն կա, հավատ կա։ Սա է հիմնական խնդիրը»։

Հարցին՝ արդյո՞ք դատական համակարգի միջոցով հակահեղափոխության փորձ է արվում, Ծառուկյանը պատասխանեց, որ իրենք բազմիցս ասել են, որ կողմնակից են դատական համակարգում փոփոխություններին։

Թե ինչո՞ւ է դեմ վեթինգին ու անցումային արդարադատությանը, Գ.Ծառուկյանը հարցով պատասխանեց. «Բայց ո՞վ ա դեմ»։ Նա նշեց, որ բոլորն օրենքի առաջ հավասար են, և ավելի պարտավորված պետք է պատասխան տան երևացող մարդիկ՝ կուսակցության ղեկավարները, պատգամավորները, պաշտոնյաները, բայց դա չի վերաբերում միայն Ծառուկյանին։ Նա հավաստիացրեց, որ ինքն առավոտից երեկո ուզում է մի լավ բան անել, որ տնտեսական հեղափոխություն լինի։ Գ.Ծառուկյանը հայտարարեց, որ կողմ են անցումային արդարադատությանը, բայց ըստ օրենքի ու ըստ Սահմանադրության։