Արցախի Հանրապետության Ազգային ժողովը հյուրընկալել է Հայաստանի տեղեկատվական ոլորտի պատասխանատուներին
Արցախի Հանրապետության Ազգային ժողովի նախագահ Աշոտ Ղուլյանը մայիսի 13-ին ընդունել է «Հանրային կապերի և տեղեկատվության կենտրոն» ՊՈԱԿ-ի ղեկավար Հովհաննես Մովսիսյանին և նրա հետ Արցախ ժամանած Հայաստանի Հանրային հեռուստաընկերության գործադիր տնօրեն Մարգարիտա Գրիգորյանին, Հայաստանի Հանրային ռադիոընկերության գործադիր տնօրեն Գարեգին Խումարյանին և «Հանրային կապերի և տեղեկատվության կենտրոն» ՊՈԱԿ-ի աշխատակիցների:
Ինչպես տեղեկացրին Արցախի Հանրապետության ԱԺ լրատվության և հանրության հետ կապերի բաժնից, «Հանրային կապերի և տեղեկատվության կենտրոն» ՊՈԱԿ-ի ղեկավար Հովհաննես Մովսիսյանի փոխանցմամբ՝ խումբն Արցախ է ժամանել տեղեկատվական դաշտում հետագա համագործակցության ծրագրերի շրջանակն ուրվագծելու և դրանց իրականացման գործիքակազմը մշակելու համար: Նպատակը՝ Արցախի ներքին և արտաքին կյանքի վերաբերյալ տեղեկատվության սփռման դաշտի ընդլայնումն է:
Ազգային ժողովի նախագահ Աշոտ Ղուլյանը ողջունել է ՀՀ տեղեկատվական ոլորտի պատասխանատուների՝ Արցախի հետ կապված նախաձեռնությունը և ընդգծել փոխգործակցության կարևորությունը: Ազգային ժողովի նախագահը հյուրերին է ներկայացրել բնագավառում առկա խնդիրների վերաբերյալ իր դիտարկումները՝ առաջարկելով՝ համագործակցություն նաև այդ ուղղություններով:
Հանդիպմանը քննարկվել են Արցախի հեռահաղորդակցության խնդիրներին, մասնագետների վերապատրաստմանը և տեղեկատվության շրջանառությանը վերաբերող հարցեր:
