Մեյի հրաժարականից հետո վարչապետի պաշտոնի համար իրական պայքար կմղի չորս քաղաքական գործիչ. Financial Times
Մեծ Բրիտանիայում իշխող Պահպանողական կուսակցության ղեկավարի եւ վարչապետի պաշտոնում Թերեզա Մեյի առավել հավանական փոխարինողները կլինեն չորս քաղաքական գործիչներ: Ինչպես մարտի 28-ին հայտնել է Financial Times թերթը, խոսքը վերաբերում է արտաքին գործերի նախկին նախարար Բորիս Ջոնսոնին, Brexit-ի հարցերով նախկին նախարար Դոմինիկ Ռաաբին, արտաքին գործերի ներկայիս նախարար Ջերեմի Հանթին եւ շրջակա միջավայրի, պարենամթերքի եւ գյուղատնտեսական զարգացման նախարար Մայքլ Գոուվին:
Ինչպես նշում է հրատարակությունը, հենց Գոուվի՝ որպես աջ կենտրոնամետ թեկնածուի թեկնածությունն են պաշտպանում թորիների խորհրդարանական խմբակցության անդամները, որոնք պրագմատիկ մոտեցում են որդեգրել մայրցամաքային Եվրոպայի հետ ապագա հարաբերությունների նկատմամբ: Բացի այդ, Betfred բուքմեյքերական գրասենյակը որի տվյալները հրապարակել է The Independent թերթը, կառավարությունը գլխավորելու Գոուվի շանսերն առայժմ գնահատում է 1 առ 3, իսկ Ջոնսոնինը՝ 1 առ 4:
Financial Times-ի կարծիքով՝ վարչապետի պաշտոնի համար պայքարում, որն սկսվեց այն բանից հետո, երբ Մեյը մարտի 27-ին կուսակիցներին խոստացավ հրաժարական տալ, հենց որ երկիրը դուրս գա ԵՄ-ի կազմից, կարող են ներգրավվել նաեւ այլ քաղաքական գործիչներ, այդ թվում՝ գլխավոր գանձապետ Էլիզաբեթ Թրասը: Այն բանի կապակցությամբ, որ Համայքների պալատն արդեն երկու անգամ՝ հունվարի 15-ին եւ մարտի 12-ին, մերժել է ԵՄ-ի հետ գործարքի նախագիծը, Եվրամիության պետությունների ու կառավարությունների 27 ղեկավարները մարտի 21-ին որոշում են ընդունել Brexit-ի հետաձգման մասին՝ հնարավոր երկու սցենարի հիման վրա:
Brexit-ը կհետաձգվի մինչեւ մայիսի 22-ը, եթե բրիտանական խորհրդարանը Բրյուսելի հետ համաձայնագրին հավանություն տա մինչեւ մարտի վերջը, կամ մինչեւ ապրիլի 12-ը, եթե այդ համաձայնագրին հավանություն չտրվի: Բրիտանական խորհրդարանում Brexit-ի համաձայնագրի շուրջ երրորդ քվեարկությունը տեղի կունենա մարտի 29-ին, հաղորդել է ՏԱՍՍ գործակալությունը:
